Internship——填塞CV以外

訪問、整理：奇翼鳥

每逢暑假，大學各學系都會同邊d邊d機構、公司搞埋一大堆internship program，好讓同學善用暑期，嘗試將自己嚮課堂獲既知識落實到運作層面咁樣樣喎。雖然經常聽聞（當然不是全部）intern勁晒時間狂影印、釘裝、入信封之類之類，但為左張CV，為左一個唔覺意唔駛interview都入得返間公司，有些慌張既同學都甘願跳落呢個火坑。

咁晒時間查實值唔值得跳落去呢？如果跳左落去係咪真係無得夠呢？

以下係幾個參與實習機動為填靚張CV、竄入該實習公司或機構以外的case，同學對實習或滿意或不，但大都能將實習經驗變成思考資源，以得出一些將經驗定性為「無聊」以外的結論。希望這數個經驗分享，可以成為以後考慮take唔take或take左之後先發現與期望有極大落差之時如何自處的參考。

Case 1

學系：建築系
機構類型：則師樓
幾錢人工：7500蚊一個月
實習時間：2個月full time

參與實習動機：
本著對學系的熱誠，覺得可以經驗爆多野做狂開OT的建築師生活一定超爽，雖然知道公司一定不會讓實習生做太重要的事情，但都想體驗一下。

實際工作內容：
「入則」，即是畫則，偶然地可以做design的工作，但只限畫下櫃之類的細矮野

感想：
同之前的想像大相逕庭，只做入則都算，但問題係連則都唔夠俾我畫，做完一件job諗住問下同事仲有咩可以做，同事竟然話：「下，咁快就做完？！er，你再做下先啦。」天啊，都話做完咯，仲有咩好做呢？效率高變成缺點，因為無人得閒理會實習生。

不過，在觀察同事工作的時候，發現學科教導的，例如建築是藝術品或建築應以人的生活為考慮中心之類的說法，在現實完全不可行，尤其在香港。香港本來就地少，加上商業主導，最緊要在一塊地上賺最多的錢，甚麼藝術不藝術的商家從不理會，連一般大眾都覺得這樣無甚不妥，建築師因此受到相當大的限制。（問：咁呢個觀察會唔會令你考慮放棄從事建築業？）咁又唔會，反而覺得自己畢業之後應該參與或籌辦一些令大眾認識建築的活動，可以是展覽之類吧，希望令大家知道建築設計的意義和價值。這些實習帶動的思考，倒是相當有用。

Case 2

學系：文化研究
機構類型：社福機構的社區發展部門
幾錢人工：1000蚊車馬費一個月
實習時間：2個月半職

參與實習動機：
實習機構從高大空藝術機構到窮苦基層團體都有，揀社福機構主要因為想知道行業的狀況，諗下入唔入行。畢竟文化研究都係d出路無限闊既學科。

實際工作內容：
原定是跟進一個推廣地區文化的計劃，做做下就變成七成做隔籬左右team的工作，包括翻譯、排版、訪問、擺街站，之類。

感想：
做乜野都係其次，雖然說不上完全是手板眼見功夫，如果只是想fulfill要求，似乎不須受甚任何學術訓練。

親眼見證社會工作被收編為幫助政府安撫民間不滿的機構為虎作倀。實習機構於行內已算比較進步，但因為財政等問題都掌握於政府手中，處處受制於人。

也不是沒有真心為人的社工，不過撥款給他們開project的機構（例如區議會）諸多要求，要在滿足他們要求的前提下，可以做到的不多。加上機構的工作量超重，有位同事上工數個月已經儲到一個禮拜假。想靠社福機構參與改變社會，好難咯。

Case 3

學系：宗教研究
機構類型：道教祠
幾錢人工：無，連交通津貼都無
實習時間：100小時

參與實習動機：
主要是好奇和貪新鮮吧，之前從未想過投身宗教界，感覺這實習機會可一不可再。又由於一直對自己的學科心存浪漫幻想，總覺得到宗教團體裡工作一定不會做routine office work，又覺得能與道教徒甚至道長接觸的機會難得，加上曾寫過關於實習機構的paper，於是不顧暑假爆多野做，也照衝上去了。

實際工作內容：
抄寫藏書閣內的藏書資料，然後輸入電腦、編寫一隻關於道教科儀的影碟的劇本、隨經生到安老院宣道，齋坐同睇

感想：
「入宗教團體工作很有趣」的幻想破滅，因為自己的工作內容有三分二是routine work，領薪的同事是100% routine office work。得著係有既，例如可以與道長交流，或在宣教活動中將觀察與之前的基督教傳道經驗作比較，對道教有較之前深刻的認識。但嚮100個鐘黎講，得著真係太少太少，大佬，100粒鐘我可以做多幾多野呀？又由於實在太浪費時間，department同實習機構連車費都無津貼呢個本來不算太過分的問題就令怨氣再多幾錢了。再講落去，問題就會引申到學系之間的資源不平均。比較其他學系的議價能力（實習生的人工）及投放的資源（實習機構的種類、實習負責人的數量），宗教系實在爭人幾皮，這已稍稍顯示敝系在大學的邊緣位置。