唔想開心萬歲，可以點？

文：亞珍

我愛香港，開心萬歲
導演：曾志偉、鍾澍佳

本來見到呢D咁既爛名，我係打死都唔會去買飛睇的，但咁啱睇到網上流傳甚廣的「非官方」trailer，直插當今香港時弊，劈頭就串曾蔭權虛偽，又正面評價零三七一大遊行、反高鐵運動等等，最緊要見到策劃人竟然又係導演曾志偉，於是煽風點火拉老友一起觀之。

齣戲講咩呢？金融海嘯，吳順（梁家輝）間廠因美國經濟不景而倒閉，繼而破產。吳順一家五口番到屋邨老家，跟老父（馮淬帆）同住。個故仔主要sell所謂「屋邨人情」，街坊個個都識左十幾廿年，邨內一眾商戶遭「領悟」無良收購，老店主人心惶惶，點知舊街坊托水龍（曾志偉）浸完鹹水海番黎發左大達，有錢到可以買起「領悟」，一眾街坊守得雲開，大團圓結局。

有唔少人話阿志偉哥呢云相當勇猛，例如佢斥大家樂對客人太刻薄、食環欺負百姓、領匯打壓小商戶、地鐵年年賺錢年年加價大快人心，但其實曾生只係貼住條界行，並冇踩落去。首先，呢D事既對錯響民間都有基本共識，況且批大家樂唔係批佢刻薄員工、收領匯皮要靠有錢佬唔係要政府揹飛。冇計啦，賀歲片，點可以係咁掃人興吖。

你話唔係呀，吳順個仔吳明（李治廷）明明做食環，響放假時為幫做小販嘅未來外父脫身，仁義上腦咁頂阿頭咀，搏炒咁話大家都係搵飯食唔駛去到咁盡，都叫埋身肉搏吖。唉，最弊佢話自己只係響工餘時間做自己覺得啱既事呢，佢一著上制服，咪又係要為交數違背良心。冷血賤格的阿頭好似食錯藥咁人性歸位，放佢一馬，訓醒第日仲邊會咁好老脾？想唔違背良心做人？劈炮唔撈架咋惟有，吳明佢真係唔明架。

呢齣戲其實同一年前果齣《72家租客》幾乎係同一個模倒出黎——西洋菜街小商戶（！）因一個買起左新宿電玩街的大陸買家意圖買起成條街，俾業主加租三倍，點知個大陸買家突然發癲，覺得條街咁旺係因為一班有活力的人，於是買起隔籬條街，搬晒佢地過去，仲免租三年，又係皆大歡喜。不過《開心》多左一堆可圈可點嘅暗示同一條trailer，即刻高下立見——《72》係堅爛，《開心》最多只係扮爛。

點講都好，阿志偉哥其實都幾殘忍，年年新正頭都要拮下香港人既傷口——香港得了地產霸權官商勾結的死症，若非得「非同凡響」的有錢佬打救，你地咪惟有坐響戲院齊發「開心萬歲」嘅白日夢。唔想齋發白日夢？你咪睇下佢補番俾你睇果條堅嘅trailer再諗下囉。

「開心萬歲」呢D語意不明到超乎常人接受程度嘅名真係唔係亂咁起架。