影評：雀聖系列之難免反高潮

影評

雀聖系列之難免反高潮

文︰阿邊個
 
《雀聖 3之自摸三百番》剛剛在春節前上畫，與《嚦咕嚦咕對對碰》側面交鋒，大家還未放假，未有時間打番八個東，就收隊了。
 
王晶的戲是一盤生意，因此一定要睇卡士先有可能知佢想點。《雀聖》三集都有元華元秋擔任最好睇的緣葉角色；主角方面《雀聖 1》是食住阿旺條水的郭晉安、加上玉女偶像傅穎淪落風塵、半退休的打女梁錚復出、王晶自己親征扮螳螂；《雀聖 2》就再青春 d，如日方中的應采兒做新婚少婦，再加森美、李蘢怡、尹子維、李思蓓。
 
從卡士上睇《雀聖 1》都勉強算係傳統戲劇經營，希望搵d 有清晰形象、或有個性的演員去托起齣戲最重要的一條線︰行賭錢冇運行，高潮當然係傅穎跳樓死、郭晉安扮傻仔喊苦喊忽啦。去到《2》就有理冇理青春熱浪加（扮晒）女性本位。
 
由此可見，《雀聖3》就真係乜都唔係︰郭晉安已冇當日咁 hit，楊思琦由頭到尾都係白痴老師形象，再加上陳伯祥勸你戒賭，同埋你未必叫得出名的陳寶轅、劉卓琪、冇睇過《季節》的年輕一代應該冇乜印象的夏雨。仲有爛到冇得再爛的劇本、少到冇得再少的笑位。嘩，主題真係人到中年，幸福家庭，無懼惡運，心靜自然涼。用王晶班底的視角去講，真係小本經營，為做而做，有飯食飯，冇飯開檯，三番當爆棚。

我真正想講兩句的係︰比較容易接受的講法是，賭片自九十年代熱潮過後，觀眾睇悶了，自然式微，《雀聖》頭兩集都不過係小陽春。難聽一點的講法是︰我們的政府越來越蠢、教育越來越反智，年輕人越來越冇耐性去 dig in，賭錢已經由令人熱血沸騰的 hardcore興趣變成贏輸都皆大歡喜的娛樂，賭片自然應運而死。

香港馬會最成功的地方之一是設計了一個全世界最複雜最難賭的讓磅賽制，讓或贏或輸的馬迷都有一考眼光的成功感——所以，當馬會的足智彩宣傳賣點竟然已變成「好易玩」、年輕人覺得馬經太難理解、越來越多人鋤 D唔數牌打牌唔計番的時候，賭博還有甚麼意義呢。

從以上這點，或者再諗下最近成日上電視、曾經一度提議在香港搞賭場的曾蔭權，來理解悶到痴線的《雀聖 3》——我們能否對帶挈過好多人有工開的王晶寬容一點呢？