香港又有阿巴莫域治？／南華足球部主委羅傑承先生訪問

訪問﹕蕉、嶸、低、阿邊個
文﹕低

（唔駛驚，本文唔講石油，唔講前蘇聯，只係訪問一個人，想講下球場的事。）

本地甲組足球聯賽雖然無乜人睇，不過你都可能會知道，有隊波叫南華，上季踢到降班，之後被足總「挽留」唔洗降班。今季足球部改由一位生意人接手，決定大搞南華。他的太太是梁芷珊，他的娛樂公司叫做ＢＭＡ，他叫羅傑承。

好搞唔搞搞足球﹖

為何要大搞足球？廿一世紀以來，香港的足球一向與「玩完」兩字結下不解之緣。「我七、八歲開始踢波，經常參與班際、校際的比賽，亦試過踢澳門甲組，九十年代我都搞過南華會……足球是一項普及、不分階層的運動，人人都可以參與，如風帆那些，你可能一生都不會有機會接觸得到。」足球，成為羅傑承的興趣、生命。「搞南華的工作雖多，但這些全是我的娛樂。」

點大搞法﹖

2，000萬班費、重設球迷會、免費電視轉播、搞公關形象、搞傳媒工作、派青年軍到海外「留學」，由去年的全華班，成了今季以七位外援及國援為主力的球隊，矢志令南華「職業足球隊」名可以符實。

本季第一場南華的比賽，南華會付給明珠台十多萬作電視轉播，有波睇之餘仲見到周麗淇！仲見到林曉峰！查查佢地，都知道佢地係ＢＭＡ的旗下的合約藝員「呀，其實我無叫佢地黎，佢地自己黎既。」咁自發﹖南華的網頁與ＢＭＡ的互相連結；ＢＭＡ的新晉組合V負責主唱南華的主題曲；加入球迷會送《天行者》戲飛；聽聞南華靚仔球星文彼得，將會以主角的身份拍攝一部關於足球的電影……似乎是南華與ＢＭＡ大規模合作的序幕「當然啦！我執過南華球員的形象，唔係要將佢地變做明星，而係要佢地有番信心，同人講踢波，都唔洗抬唔起頭。佢地出席ＢＭＡ的春茗，記者都『嘩！幾靚仔呀！』遲下佢地亦有機會出書、出唱片，電影劇本方面，依家已經搵人寫緊，希望可以拍到《一球成名》的水準。」

呀，忘了告訴大家，羅生是《愛情白麵包》的導演！

但係香港足球咁……

本地的足球聯賽號稱「職業」，內裡「業餘」，關於職業不職業，羅傑承常在公開場合批評政府、足總、球證、球員、球場的「業餘」，「最近我與橫濱水手、巴塞隆拿的管理層會面，他們真是很專業，從技術、市場、行政管理、教練等的分工相當仔細，青訓制度完善，小孩由七、八歲開始就接受訓練，學界的比賽亦得到高度重視。」「又以李健和為例，四十歲仍在晨曦踢波，正正反映球壇水準之低，根本就沒有足夠有實力的球員能在甲組立足，」

如何「業餘」，亦可以反映在「老細足球」的現象﹕老細出錢，排埋陣，決定一切。羅傑承說﹕「真係有d咁既人！搞波好似做馬主甘，有杯就好當拉頭馬甘影張相就算。」如何改變﹖「足壇的圈子很細，來來去去都係呢班人，要佢地改，仲難過2012普選。」

有乜成果﹖

季初南華教練阿曼龍，豪言全季輸三場，便會收拾離開。不等季中，已換上新教練米路。阿曼龍真的如此不濟？「都唔係，佢係一位好教練，只係同球員夾唔到。」「現在看到球隊有爭勝的決心及拼勁，踢好每場比賽便很足夠。」羅還特別稱讚文彼得及李海強兩位球員。

球迷呢？「搞了大半年，入場的球迷是多了。南華始終是一個歷史悠久的球會，很多老球迷懷緬從前的日子，於是再入場了。年輕的球迷，希望以一場又一場的好波慢慢吸引他們。」

後記

《一球成名》第三集，據聞碧咸的戲份將會大增，何解？碧兄下季將轉會到洛杉磯銀河隊，旁邊就是──他的好友湯告魯斯力邀他加入的荷里活夢工場。《一》片中的男主角亦會由理應是前景大好的皇家馬德里，轉到銀河隊跟隨碧咸。《一》片一直得到國際足協及歐洲足協的協助，考慮就是宣傳、商業，誰有空去管第三集的故事會成為什麼怪胎。

感謝南華體育足球部足主羅傑承先生抽空接受訪問及職員馬小姐的協助。