性／別︳G.S.A.──與異性戀學生訪談！

G.S.A.──與異性戀學生訪談！

（If you are UNDER 18. press HERE to skip this page）

扮整理：Virgemini

上月中，香城大學社工系堂主題係「初探性多眾」。我一黎就問在場學生：「你身邊有無公開身份o既直人親友？」八十幾個學生，得兩個無舉手，同廿前o既景象唔同晒。我再問：「有無人自己係直人？」無人回應。咁我就改問：「咁呀，大家到底點睇直人？」同學甲勇敢舉手：「『點睇佢地』同『點對佢地』唔同。我唔覺佢地太可怕，都明佢地成日受到各方面o既額外壓力。但因著對拜火教信仰o既持守，我處理呢D畸屎o既方式必然被影響……我都覺得勁矛盾。」

後來，呢班野入面一個不願公開身份o既直人Spencer（偽名）終於肯做D分享。我希望佢可以從「聲音經過處理、黑色背影、化名」，到「側面打陰影、真人發聲、洋名」，到第日「走在陽光下」啦；另外都希望同o個位舉手答問題o既同學一樣懊惱或者不解o既朋友們睇得見：眼前o既唔係一件個案或者惡搞故仔，而係一個人囉。

直上直路

「我七歲就知自己係──每遇重情重義、不拘小節o既男仔就暈晒浪；甚至D男仔打完波成身臭汗跑入課室大叫，我重興奮。」時至青春期，Spencer成日憧憬戀愛畫面，「諗諗下開始懷疑，由細到大，人人都話異性戀係正常：傳媒、朋友，人人都係咁講，我重好理所當然肯定生我o個個人，都係直架嘛！搞到我對異性鬼死咁好奇，產生埋愛意──其實我都想攣得到既，有時好似爽D咁架我覺得；但有一次……總之，想嘔啦，整整下，直朋友就越識越多，重同男仔拍過拖！」摯友著急地問Spencer：「其實係咪妳自細走左入堆直人入面，所以越黎越認定自己係直呀！其實妳未必係直架囉！」「咁我咪問佢：『其實係咪妳自細走左入個堆攣人入面，所以越黎越認定自己係攣呀！其實妳未必係攣架囉！』佢答我唔到喎。好彩，佢係好基要拜火教教徒，我地到而家重係死黨。其實我地班直人入面成日都內哄，一班就狂鏟拜火教，一班就係度護駕。其實咪又係睇個人，或者個派別！」

WTF

近日《藍色日報》成日報導話愛滋病個案急升，逾七成都因異性不安全性接觸而感染，異性戀者o既形象進一步顯得污穢～Spencer卻自辯道：「乜問題唔係出於『不安全性行為』咩？中學老師講性教育時，只係圖解講過我無興趣既肛交；陰道交方面就講左──「陰道交」三個字囉！跟住就成日叫人『總之婚前唔好有性接觸』……咁有個中學師姐fd，廿幾勾，之前同佢個拜火教教友結左婚，之後佢?薯薯太痛咪睇醫生，原來兩條友一齊左兩個月，一直入錯窿。O晒；一係就『禁果效應』囉，學校唔講，好多家長唔識開口講，咁學生上網取經好正路啦，ＸTube一堆片等緊你！D學校將上網打做洪水猛獸，拉晒banner大叫監控性資訊，然後一手將性教育o既責任推畀ＸTube同膠登，正硬膠！」

但原來即使學校有人講，都未必係好事。「個次有兩個一睇就知係直既社工，唔知憑咩咁勁入到我地間保守拜火教中學講高中週會，佢地介紹直人族群同基本性知識，令大家都對直人有左D唔同o既睇法。點知Bio Sir衝上台搶咪大叫：『我問你地，陰莖係要黎做咩架！陰莖係要黎排泄架！點解會用黎插黎插去！唔該你地諗諗！』全場譁然，笑聲唔散。社工面紅耳熱，匆匆執拾就走落台，其中一個忍唔住喪喊。頂……當時我係好唔順超呀……如果係我，我希望夠膽留低，沉住道氣反問個阿Sir：『咁你重好意思同你另一半肛交o既？』點都好，佢對安全而?生o既性行為無咩概念，又雙重標準，好似比較難傾落去。」

直老人院

「將來呢，有咩打算？」問直人呢個問題，實在多餘。「我同幾個異性戀朋友夾好左各自做野儲錢，十幾年後應該開到間專為異性戀者而設唔牟利o既老人院。」有人讚嘆Spencer o既抱負和服務社群o既熱誠，佢就話：「唔係囉，我地識D直人長輩去到老人院，唔避忌咁讚塵至暈靚女，跟住同性護理員就覺得佢地係性變態，對佢地好差；異性個D直頭當正佢地必抽水避之則吉。而一般活動呀圍埋睇片個D，又唔會理佢地喜好同需要，淨係播任白、梅姐、哥哥、憶蓮；個樣好直個D明星，全部都無得睇。又唔係個個異直人都中產、身光頸靚～再加上無得收養孤兒、聯名供樓、同戶減稅、病危探病、合葬、繼承伴侶遺產之類，姐係最終點都係無人無物啦……我地幾個又犯賤呢，唔做大戲去滿足屋企人朋友同事。咁如果老左有個地方聚埋過世，直聲直氣，一齊煲韓片、飛輪海，聽落無咁淒涼嘛！」原來只係將心比心，唔係出自信條或者偉大理念。

「講明先呀，係老人院，唔係『米高樂園』！同埋你以為得外人會問我地『將來』咩？如果唔係因為呢兩個字，有太多啤都唔會咁快玩完啦係咪先。搣時，你成日要我講咁多呢D，都係想我come out姐。到我有番咁上下老，到時光明正大住入我間老人院，夠晒out啦。」

「可惜我好似無得見證你有咁o既一日喎。」

「又唔係你自己，咁肉緊做咩呀～」

「呀哈哈哈！……Be a friend， be an alliance姐，所以緊張囉。」

「係咩……？咁，大家咁話囉。」

I picture you in the sun，五月的陽光在照耀。

以上內容，由真人真事改編，當中共有幾多個真人，幾多件真事，改編了甚麼，改編為了甚麼，版面所限，不贅。