假神怪真保守——《森冤》有幾眼冤〔影評︰《森冤》〕〕

文︰阿邊個

《森冤》
導演：彭發／98分鐘

《森冤》有四個角色，鄭伊健是潦倒植物學家，李彩樺是蠢爆電視主持，舒淇是靚女獨立探長，劉兆銘是撞鬼森林看更。另加客串賤格強姦犯周俊偉。

故事是很多人不斷失蹤，懷疑到由劉兆銘睇場的某森林自殺。舒淇查案，誓要釘死在森林裏姦殺少女的周俊偉，碰上有計的植物學家伊健。二人合作查案，李彩樺是鄭的女友，谷爆。

搞完一輪後，真相大白，森林確有樹靈，但不會害人，伊健上位，彩樺大肚，舒淇更明白世界，劉得見愛女亡靈，大團圓到傻。

我要講的是︰主角其實分成非常簡單的兩類，一類就係相信科學的、開通的、有觀察力的、對妖怪好冷靜的〔鄭劉〕。一類就係冇腦的、緊張的、 defensive的〔舒李〕。

簡單黎講，就係前者係男主角，後者係女主角！再結合舒淇獨立到暈的形象，就知道在導演眼中，獨立女性的獨立是乜意思——就是倔強地唔想男仔幫但最終咪又係要男仔幫的意思。你話死唔死。

更死的是︰明明鄭伊健就同舒淇夾一萬倍，而李彩樺就係唔死都冇用地蠢，但經歷左一番事情之後，鄭竟然「冇」變心，仲同李彩樺結婚——即係，導演忍唔住大叫，做人，都係安份守己 d 好，你睇佢地幾「幸福」！

呢類神怪片，態度懶先進，成日串 d 唔信鬼的人保守，接受唔到世界上有好多解釋唔到的野。但其實這只是虛偽的糖衣，裏面的人倫態度、性別政治，一面倒向右傾。《森冤》就是一例，唉，乾脆拍齣《眼冤》好過啦，至少慳番 d 外景錢丫