肉騰騰，開開心〔影評︰《戰狼三百》〕

文：弟

《戰狼300》
導演：薩克薛達／117分鐘

《戰狼三百》好睇，我都知。三百個筋肉人，為左唔俾人蹂躪佢地ｏ既（　　），係陰暗ｏ既山谷道口，同邪惡加大碼黑鬼率領ｏ既中東大軍格劍，激戰連場，下下入肉，仲會唔夠好睇？

咁好睇，睇埋原著漫畫呀笨；我都睇左，發覺電影版本加左料，都米話張戲飛唔抵：電影裡面筋肉人頭領個老婆出場次數大增（原本出過一次場咁大把），由漫畫ｏ既惡死黑面變成溫柔體貼，再加場床戲益街坊；果個仔，又聽話又趣緻，漫畫入面完全冇出現過，電影成個俾晒你；連同老婆ｏ係白痴議會遊說，再俾淫賤議員搞，成條線，咁有劇情，都係電影版加落去ｏ既；其餘仲有好多，有興趣可以睇下對下。

不過電影同漫畫有咩分別都冇咩關係，總之場戲好睇就得啦；又不過咁ｏ岩，《戰狼三百》ｏ係美國上畫果陣，美國國會就ｏ係度傾緊「緊急戰爭撥款法案」。咁呢套戲，對於呢件事，俾ｏ既信息就係：中東梗係要打，睇下佢地幾邪惡，你仲有老婆仔女架！議會唔出兵，就係佢地白痴腐敗（仲有淫賤議員會搞你老婆）！不過重點係，我地ｏ既士兵，個個都英勇（且筋肉）；我地ｏ既領袖，更加係英雄（又筋肉）！所以我都唔奇怪，點解呢套戲要呢個時候上，同時又加插「國內／議會」呢條線，仲憑空為主角創造一個美滿家庭，雖然，讀過初中西史都會有疑問：乜ｏ係斯巴達社會有所謂「家庭」ｏ既咩？

不過忠於史實，正如忠於原著，都唔係ｄ咩重要ｏ既野；真正重要ｏ既係，當中ｏ既差別，放ｏ係當時環境，可以點樣理解。又不過，電影其實都只係娛樂，或者唔駛諗咁多，搞到咁「政治」；但係道理其實可以好簡單：假如「政治」係要觸及群眾，嘗試在其中造成影響的話，越有「娛樂性」ｏ既野，就越「政治」。

講時講，我諗《戰狼三百》，對於身為香港人ｏ既我地，唔會有政治宣傳作用；因為我地無論如何，都厭惡任何大小衝突場面，所以反戰。又講開，《戰狼三百》固然好睇我都知，不過想要更多血腥、更多暴力，我強力推薦大家睇港產片《力王》，比起黎，《戰狼三百》入面果ｄ真係濕濕碎，最緊要ｏ既係，ｏ係《力王》入面樊少皇一拳鐘爆人地個頭，之後唔會同你講「係為左正義同自由」呀嘛。