情色｜Chrissie 信箱

Chrissie 信箱

編按：由於Stephy患上感冒，故是期由Chrissie代答。日後常刊都也可能由Chrissie回覆，不便之處，敬請原諒。

Chrissie:

我今年廿歲，升yr2，上年入U時認識左男生P，比我大一年，我對佢有好感，佢又好照顧我，帶我食飯，陪我sit堂，我住旺角，又無宿，有時係大學夜左佢都特登送我番旺角再自己番大學。我都有諗過同佢一齊，未到聖誕節佢已經向我表白，我地感情都有進展，不過佢開始有些舉動令我不安，行街時總係攬到我條腰好實，忽然就係街頭錫我，好多次我都感覺到佢有反應，但我無經驗，唔知點算好，又唔敢話唔好。可能我以前女校，唔慣同男仔太親密接觸。後來佢開始經常襯佢同房唔係度帶我番宿，我話我未ready，初頭一兩次佢都好似好就我，後來就開始好惡，話我唔鍾意佢唔理佢感受，話拍拖一定要做……

上個禮拜，佢再帶我番房本來話拎少少野就走，點知好粗暴咁想夾硬黎，我反抗， 佢就打左我一巴。我忍唔住打左俾另一個相熟細o mate哭訴，個男仔仲去同佢大吵左次，打番佢轉頭。其實係咪我唔啱呀？ 仲累到佢地大打出手，係咪我太怕醜嘅問題？

阿芝

*************

阿芝：

你就真係有ｄ怕醜喎，唔係話你怕醜唔搞啊，係話你太怕醜唔一開始覺得唔舒服就話唔好呀！

你就真係唔啱啦，成日都話自己唔啱……

嘩！P拖都未拍（但似乎佢覺得你地已經係拍緊拖啦喎） 就已經郁手不特止，仲要話係因為唔同佢做就係唔理佢感受，個理由係咪牽強左ｄ呀，唔合佢意就話唔理佢感受，你真係要諗諗係咪要同呢個人一齊喇。自己心情唔好搵人傾訴好自然啫，你怕自己「唔啱」，唔通就要屈埋屈埋？雖然你冇講，我亦唔希望你會責怪你個o mate，雖然佢打阿P唔係一個明智的做法，但動機上佢都係唔抵得你俾人蝦啫，所以，你應該諗清楚「累到佢地大打出手」的矛頭，「唔啱」既係邊個啦。

嗱！ 而家就係你抉擇的時候啦， 既然你都未覺得同佢開始拍拖（佢覺得係咪拍緊拖就佢既事啦！ ），就係時候諗下係咪要同佢開始啦！我唔知你點睇佢郁手打你既呢一巴掌，又唔知你係咪珍重佢做觀音兵而可以蓋過呢一巴掌啦，定係佢係米打完之後誓神劈願話唔會再有下次啦！如果佢未出呢一巴掌，我仲可以講下有咩方法可以令你冇咁怕醜， 或者就算怕醜都好，有咩方法可以埋牙之前打發到佢，但如果我而家仲講呢ｄ野，仲好似blame左你添，所以我今次唔會講有咩方法架啦，我Chrissie 就唔係ｄ盲目順從讀者意願既人黎既，等你下次搵到個唔會打你而你又覺得怕醜時，你再寫信黎問我啦！

其實你話你自己「唔知點算好」，又唔見得喎，你好清楚你對佢有好感，好清楚你打算會同呢個男仔拍拖，好清楚佢有咩舉動令你唔舒服，個問題只係你「唔知點／ 唔敢」話唔好，咁即係要問你，你怕ｄ咩呢？怕搞壞大家關係？怕冇左呢個觀音兵？

我覺得咩都係「秤」既啫，唔想比佢夾硬黎，自己就要學下點話唔好（你都廿歲，坐同佢講又好， 佢又夾硬時喝佢又好， 呢ｄ野你自己諗啦）；如果唔係，你就只好強忍淚水，唔好再反抗啦！

呵呵！

Chrissie