中大狂舞派？！ 在龐萬倫的日子

文：聰

「黃修平導演路過香港理工大學時，赫然發現7-11對開的空地上，有一群年輕人正在起勁地練街舞，他們是理大舞蹈學會的成員。好端端的為何不留在排舞室練習呢？」──〈《狂舞派》的狂〉，陳若谷

電影《狂舞派》講述一群充滿熱誠的年輕舞者克服在大學練舞被趕等不同的困難，追尋自己的理想。其實除了理大，或許中大也有潛質拍出另一套《狂舞派》。

香港中文大學現代舞學會（Dance Soc），因上個學期尾李慧珍樓停用，遷往位於龐萬倫學生中心的新屬會室，而練習場地亦改為龐萬倫3樓鏡房。但可能你也曾看見他們在校園不同的角落練舞。「好端端的為何不留在排舞室練習呢？」我們訪問了兩位Dance Soc的同學，希望可以從他們的例子揭示龐萬倫的管理問題。

這些機會……

「其實你地係邊度練舞？」

「以前就係李慧珍樓鏡房既，而家佢鎖住曬，就要係龐萬倫book鏡房用。」

「龐萬倫鏡房又新又大唔係仲好咩？」

「以前係李慧珍就好自由，冇咩監管，基本上想用就用得。而家龐萬倫要book場，好多手續同限制，例如book好左夜晚8:00 – 10:00，到時仲要搵OSA職員辦領場手續，又要交$200按金，又要齊人，開門俾我地用既時候已經8:15，9:45就會有職員催我地執野走，book兩個鐘，得返個半鐘用炸。走之前仲要俾職員check過，冇郁過房入面D野，冇整污糟塊鏡先可以拎返$200走。

而且，龐萬倫間鏡房有一半都擺左D扣住曬既凳，OSA話間房係多用途房，會有講座呀個D喎，所以唔俾我地郁，會阻住我地跳舞。試過搬開左，臨走幫佢砌返好，後來佢打電話黎話D凳有D唔同，叫我地返去再排過。

仲有，我地book場有quota限制，一星期只可以用一次，但係你知啦，我地dance soc幾乎日日都要練舞，其他時候唯有自己再諗辦法搵地方練啦。」

如珠如寶的龐萬倫

「龐萬倫鏡房唔比你地用，但係真係時時都有人用咩？」

「梗係唔係啦，其實都唔係好多人會用，不過唔知點解唔比我地用。因為我地曾經向OSA投訴過租場既問題，所以佢地派過人同我地傾。我地問點解冇人用個時唔可以比我地walk-in用，好似籃球場咁，都係walk-in架啦。佢話因為棟野新，驚有損壞，又唔知搵邊個負責，所以係規管上要嚴格D。好唔合理囉，明明籃球場都係walk-in，因為新，所以就驚爛？咁佢走廊有人行都會爛架啦。其實我地唔通會係塊鏡度畫畫咩，我地要用加嘛，點會整爛佢。以前係李慧珍都係我地用完自己抹返塊鏡啦。

我覺得租場既制度可以好D囉，例如有D屬會分明係對鏡房有較大需要，好似Dance　Soc、精武、柔道咁，單單用quota同先到先得都唔係最合理既分配方式，應該加上需要程度去衡量。」

港九新界一日遊

「咁冇得用鏡房既時候，你地會去邊度練？」

「我地唯有出去租政府體育館用啦，放左學經常要去唔同地方練舞，例如：西環、竹園、紅磡、將軍澳、鯉魚門等等，港九新界都有。除左時間同體力之外，經濟負擔都好重，因為除左場租之外仲要租音響，計計埋埋每個星期可以花過$1000，D錢最後都係我地自己夾返出黎。有時為左慳返租音響既錢，我地要自己搬D音響出去用添。點解我地成日都要transit？就係因為龐萬倫鏡房根本唔favour我地用，甚至好似都唔係好想比我地book到咁。大學D設施唔係應該比我地用咩？」

Big Brother is Watching You……

「你地有冇試過用空地或者龐萬倫入面D公共空間呢？」

「有呀！我地試過用YIA同伍何曼原個3樓平台，只係熱下身，就有職員黎趕我地走。（佢用咩理由？）佢話呢度係空心既，靠條柱支撐住，可能會lum喎！咁D人行過都好危險啦，唔好係果度dem beat添呀！」（按：舊年曾經見過有人夜晚係個度練beat，小心呀你地！）

我地都試過用龐萬倫入面冇擺野既公共空間，過左一陣就會有職員睇到CCTV黎叫我地唔好嘈同趕我地走。試左幾日之後，原位就突然擺左D?係度喇。

人地入黎探下你地姐><

「你地係入面仲有冇咩不愉快既經歷？」

「我地間Soc房係入面啦，用CU Link拍卡入既，點知原來職員都可以隨便拍卡入黎。有時晏晝係入面，冇啦啦會有個姐姐開門入黎，望左幾眼，唔知係度check我地定咩，之後就走左。我覺得我地係Soc房入面做野應該有D私隱囉！仲有一次有個莊員係Soc房過夜，半夜竟然有職員1個鐘入左去4次，叫佢唔好係度訓覺添。（按：咦？半夜都有職員，即係可以開24小時？）」

後記

其實，Dance Soc的例子並不特殊，新落成的龐萬倫對於設施的規管十分嚴格，不同的使用者都會遇到不同的問題，例如感到被監視、租用手續繁複、不同屬會要共用Soc房、不合理的開放時間等。種種問題在於學生事務處（OSA）在管理龐萬倫時的心態，並非方便同學使用、提供活動交流的場所，而只是想讓新的大樓永遠新下去，讓龐萬倫成為一個虛有華麗的外表，卻不服務同學的空殼。