社會︳澳門廿三條——天網，越織越密，織呀織呀……

澳門廿三條——天網，越織越密，織呀織呀……

文：嘈嘈嘈嘈乜野呀冷靜Ｄ啦無人話你呀仲想點早晨食左飯未

由2008年10月22 至11月30日，經歷不足四十天的草草公眾諮詢後（較諸香港廿三條的三個月諮詢期還要短得可憐），澳門終於在2009年1 月5日，通過第廿三條立法的《維護國家安全法草案》。

試探

然後在三月初，本來應邀到澳門參加研討會的香港大學法律院院長陳文敏先嘗刀鋒，被澳門警方以保安理由，阻止入境。民協的馮檢基及廖成利亦隨之闖關，依然失敗而回。3月15 日，泛民主派更大肆宣揚，三十五人浩浩蕩蕩試關，還強調只是與澳門民間團體作簡單、和平和理性的交流。結果三十人成功入境，惟梁國雄、曾健成、古思堯、李卓人、雷玉蓮等五人卻被拒絕入境，隨後被遣返回港。

其實闖關失敗是意料中事的，早在08年12月20日，澳門廿三條還未正式立法通過，當地已有民間團體發起遊行，要求「完善《維護國家安全法》……既維護國家安全，更須保衛公民基本自由權利。」更有人單刀直入，高舉「惡法禍澳，天地不容，不要23條，還我人權。」標語，此時，有香港議員及民主派人士共20多人，打算參加反廿三條遊行，但又被拒絕入境。廿三條未立，已是如此，通過後的境況自不可小覷。

醜‧陋

澳門廿三條真係為維護國家安全架，不過就係先要騎劫普羅大眾既人權囉。唔理啦，如果邊個「公然及直接煽動」顛覆中央政府行為既，就係嚴重罪行，坐監唔少得。但係點為之「公然」，咩係「直接」，就真係唔知啦，總之就唔係我地話事。草案文件就話「直接」係「直言不諱地鼓動他人」，即係話一個唔覺意，同人交換意見或者談論乜野政治呀，國家大事呀，隨時中招，講笑都係咁話。唔單止係牽涉以文字入罪，更加係以言入罪。

仲有，條例又規定「竊取、刺探或收買國家機密」就已經係刑事罪行，都費事理你係咪意圖用黎出賣、轉介定披露。但「刺探」同查詢、索取或者研究既分界係邊？「國家機密」既定義包括，涉及國防、外交及中央與澳門特區有關事項，應予包密的文件，又係廣義到乜咁。諗起以前聽過個笑話：有個人話某總統係白痴，被判罪，原因係洩露國家機密………哈，而家先知唔係笑話。

因為澳門講到明「國家」，係指中華人民共和國，咁，解釋「機密」定義既權力，其實即係交在中央手中，死未！第六條第五項條例中，寫到明在刑事訴訟程序時，行政長官取得中央人民政府的證明書，然後發出證明文件證實案情所涉屬國家機密。亦都即係話未有出事，未有產生訴訟前，有邊個知咩文件係涉及國防呀、外交呀、中央與特區關係之資訊係國家機密？咁係咪指，執法果陣，有理無理，拉左先算？

仲要再衰既係，第六條呢條「禁止竊取國家機密行為」條例，講明係適用於澳門以外既政治組織、團體、個人，擺到明畫公仔畫到出腸，唔單止澳門，其他地區（當然唔少得香港）既任何團體組織、傳媒、學者、甚至學生，仲有更多自以為不會中招既人，都咪使旨意走出澳門廿三條既五指山。

當然，澳門廿三條點會就咁俾你捉到佢路？刺探國家機密前既「預備行為」都被列為刑事罪行囉唔該。本來澳門廿三條既諮詢文件入面，成日都將各重要既條款，同葡、法、德、意各國既刑法典，作一個參照，但偏偏就係呢個「預備行為」，係澳門自創。都係果句，咩係預備行為？或者到被判罪果日先會有頭緒……掛！

香港廿三條？

你無睇錯，係香港廿三條，絕非離題。澳門廿三條對香港既影響，不僅僅是作為一種限制、監控的作用，仲有可以解讀既隱藏政治意義就係，澳門通過廿三條，係中央用黎作為，對香港政府既一個示範，一個壓力。別以為香港廿三條不會捲土重來，實際仍是陰魂不散。何厚鏵就係臨離任，先搞呢單野，懶係向中央獻媚，為自己的工作報告劃上完美句號。唔擔保曾蔭權唔會咁做。

不是空穴來風，試看香港政府的舉動：先黎個「網絡廿三條」既建議先，又自行委任代表，以掌管香港網上域名.hk既管理公司，又查封民間電台。諸如此類。都好似溫水煮蛙咁，逐步箝制自由。所以，就算香港再黎多次廿三條，真係有咩咁奇？

就算未有廿三條，香港政府都已經可以憑《入境條例》，達到與澳門廿三條阻止其他人入境既相類似效果（詳見附表），而所凸顯的問題已嚴重到理應受到關注的地步。入境處通常根據「遣送離境令」或「遞解離境令」令到所謂既「不受歡迎人物」，被拒絕入境或被遞解離境，至於係不受特首歡迎，定係國家主席歡迎，就不得而知了。

入境處多次打官腔，以「不評論個別事件」為由，拒絕向公眾解釋，那些被拒絕入境既人，又唔一定會得到入境處提供具體的理由，即係隨時碰左成面灰，都未必知發生咩事。

從歷史淵源看國家安全法

《國家安全法》（National Security Act）原是美國在二戰後，1947年訂立，以對付共黨，圍堵蘇聯、中共。依據這條安全法，權力強橫到可推翻別國政府的中央情報局因而成立，自此雞犬不寧，在五十年代，更助長麥卡錫主義的出現，由美國參議員約瑟夫·麥卡錫（Joseph Raymond McCarthy，1908-1957。）煽動美國全國性反共「十字軍運動」，尤其在文藝界和政府部門鼓吹互相揭發之風。

許多著名人士如演員查理·卓別林、原子彈之父－羅伯特·奧本海默（J. Robert Oppenheimer）和中國著名科學家錢學森，都受到軟禁、禁止入境、撤消職務等等不同的迫害。當時，被視為美國黑暗時期。可見一旦有類似國家安全法的條例，其引伸的後果——如成立一個特別情報部門、制造白色恐佈的氛圍——可以很嚴重。

至今，中國卻承接昔日死敵的理念，欲在港澳推行有關國家安全的法例，是否意圖在其司法管轄以外地區，建立遏制異議聲音的體制？

理論上，國家安全法並不等同於國家專政，但實際卻常被作為政治工具而濫用，按照《約翰內斯堡原則》，為防止被執政者濫用，訂立國家安全法時，一要用語狹窄嚴謹、詞義精確無誤的條法，澳門廿三條沒有做到；但最最起碼應該要另立一條補充法，使人民表達或資訊自由的權力與所謂國家機密有衝突，得到保障。

因為如要人民能有效監察政府的運作，全面參與社會的事務，他們就得有權獲取由政府保管的資料。但這樣的補充法，直至廿三條木已成舟，仍是影蹤全無。澳門政府是不想被人民監察嗎？為什麼？

還未完

撰文至前，無端想起六四運動發生至今將屆二十年，紀念活動在內地依然受到打壓，香港雖一直有舉辦，但在這個相對個人、言論自由，較為開放的時候，當中深層的意義，有多少人會去探究、關注？還是要等到自由被愈收愈窄，愈逼向邊緣時，才開始有一點點的反應？想到此處，心頭忽然耿耿。