離奇過無記〔第三十一屆香港國際電影節〕

文：弟

《離奇過小說》 
導演：麥克．霍士達場／美國／2006
彩色／113分鐘 

點可以將一個經已好老土o既故事搞到再老土d？《離奇過小說》就做左一個示範。故事開頭其實令人好有期待，男稅務員每日如是o既有生活程序突然間被打亂，出現o既唔係外星人唔係超能力，而係佢o既生活俾人加左旁白。旁白除左主角自己無其他人聽到，仲要講下講下話佢就快會死；另邊廂女作家諗極都諗唔到自己本小說點收科，諗到厭世諗到出版社派人貼身追債；兩個人似乎無喇無lung，原來男主角聽到果個旁白就係個作家，作家寫緊本小說o既主角就（又）係佢。呢個條橋其實有好多位置可以繼續玩盡佢，例如男主角聽到o既旁白，就正正係觀眾聽到o既、套戲本身o既旁白，大可以由呢度直接牽涉觀眾；又例如兩條線——女作家同男主角稅務員之間「寫與被寫」o既關係，其實十分之接近有關「真實」（或「文學」）o既問題……

但係呢套片就成功咁令到有好多可以開發o既位置o既一條好橋變成一個有咁老土得咁老土o既故事，仲順手拉埋一眾本來甚為有趣o既角色落水，正所謂一鑊熟：一出場焗餅維生又因為唔同意政府而主動逃稅o既女仔，到最後變成只係一個「人地條女」，正確黎講係「主角條女」，而其餘空白；成日住睡衣成日設想自己以唔同方法死o既女作家，最後變成一個普通o既「中產、有文化」女仕，仲作勢開展第二春；而男主角，「俾人旁白」咁頭，都只不過係成為一個典型絕症病人，無喇喇好「正面」突然要搵人生意義。最後女作家放棄寫悲劇結局所以男主角英勇救人大難不死，所有野都美好所有野都正面積極。

或者套片係想講「大團圓，有咩唔好？」，但係就正正示範左論述o既表達如果放棄批判態度而淪為為既有秩序加固，可以有幾樣衰。故作扭計結果令一個老土o既故事，變成兩個層次，老土乘以二。任務完成。但離奇在，一個有趣o既開頭，就算睇幾多無記劇，都唔明點可以搞到咁老土。