最後一次︰現代語言及文化系（Modern Language and Culture）〔係咩吾系〕

文︰莎

今次介紹既係學系，今年唔訪問就以後都唔會再有機會，因為到左出年，你根本唔會再搵到一個讀MLC既學生。

4、35、150

「現代語言及文化」，簡稱「磨靚溝」或者MLC。理論上MLC最後一屆畢業生以讀三年計，上年已經畢晒業，不過因為有D同學去左exchange要extend，到依家都仲有「碩果僅存」既四個同學係major in MLC。MLC由成立到拆系收得果四屆學生，若以每年約三十五人計，即係歷史上MLC既畢業生都唔過百五人，可能仲少過中、小學一個年級既學生人數。唔怪得同學話佢地大概可以整番個MLC同學會，因為MLC可以係第一屆同最尾一屆既學生都識得，都應該冇乜邊幾個系可以做到。（計埋有D同學去過exchange要extend同埋有D讀M phil做TA，唔係亂吹架！）

讀 D 咩

咁究竟「現代語言及文化」係讀D咩？同學即時係話「唔識答你喎」，佢話最多只可以答MLC會讀三樣野：現代語言（即係粵、英、普以外的語言）、語言學同埋文化研究，而呢三樣野又完全各不相干。同學話基本上「語言學」同埋「文化研究」無論在學科內容、研究方法、課程分類、甚至上tuto的形式等各方面都好唔同，例如語言學會好technical去分析語言，感覺有D似計數，而文化研究就比較會從文本出發去分析文化現象。不過同學補充話，讀讀下，當對兩方面都有D認識，會發現某D位都融合到，始終「語言」同「文化」兩者都有一定既關係，亦有tutor講過覺得對一科的認識對另一科的研究幾有幫助。不過呢D就要靠你課堂以外自己去體會啦……同學仲話因為無論係語言學定文化研究，都比較會重視D平時大家唔會aware到既語言或者社會現象，依家同學睇身邊既事物會比較仔細、小心，尤其係當知道社會上好多觀念既bias都好嚴重，會唔敢太快落觀點，費事bias左某方。同學舉例話例如香港既報紙就好多時都會有bias。

轉系唔轉系

MLC既同學主修科要修69學分，其中9學分係讀外語，「語言學」同埋「文化研究」就各要讀兩個”intro course”，而且各至少修21學分。即係若果你比較鍾意讀文化研究，都起碼要讀7個語言學既course至畢得業，受訪同學就係咁既case。所以對部份MLC同學黎講，真係發覺自己淨係鍾意讀語言學或者文化研究，逼住要讀21分另一科會成日呻好辛苦。於是拆系對呢D同學都係一件好事，因為最尾一屆既MLC同學可以選擇唔需要extend咁「轉系」去語言學或者文化研究，事實上都要唔少同學咁樣「轉系」，今年都有一個語言學畢業生係MLC轉過去既。同學話佢冇揀轉去其他系，一來當初入黎讀已經諗住「語言」同「文化」兩樣都會讀，而且都唔想個系好「人丁單簿」咁消失。就算兩個好唔同既學科分拆開好似係好事，始終當初要分拆係因為財政資源既問題。

拆系唔拆系

問到同學幾時開始知道MLC要分拆呢件事，原來當中的過程都幾搞笑。「Year 1 Sem1尾Sem2頭果陣，某中大唔關事學系既同學唔知邊樹八到MLC要拆系，於是特登透過ICQ search MLC既同學爆呢件事，然之後D同學先搵番Department查證。」咁結果當然係真啦！

MLC由英文系分拆出黎，開得果三年就話要摺，仲要兩個學科d老師又「派系分明」，唔多理對方，完全冇人諗過兩個學科可以點樣融合。所以同學都話佢覺得成件組系拆系好兒戲，有DD畀人呃既感覺。而成班同學初初都好反對拆系，但係當校方講到明一定要拆，所謂既「可以傾下」都只不過係遲一年定早一年拆；再加上反正一路兩個學科都「分到咁開」，於是同學們除左嬲之外，大概就只可以無奈咁接受現實。同學話或者正如當時阿豆（前MLC tutor，依家係文研instructor）所講，就當大家上左一堂真實既「權力課」。

伶仃既學系「生活」

依家MLC冇學系辦公室，同學話都唔算麻煩，因為有咩事都可以去語言學系既辦公室。雖然冇系會，但係個系會印一路都仲function到， book到房。之但係得四個學生，影畢業相又點搞呢？「冇架，又冇系會，於是所有野都係自己搞，咁當然唔會大搞啦。影學系畢業相都仲好D，多幾個人一齊影，都會佈置下。到到影書院畢業相，咁一個書院一個學生，所以乜野攤位、波波橋都冇整，反正就走到邊影到邊，周圍借人地D波波橋影就算。到書院影集體畢業相時仲好笑，一條友都唔知企邊度好，有D人問『乜仲有MLC咩？』，有D知咩係MLC但係就傻傻地咁問『乜MLC拆左咩？』類似既問題平時都聽唔少，總知最後就因為翻譯系有熟人而黐左去翻譯系到。而chapel逐個學系影果張，懶得個別搵老師，於是揀timeslot時特登排到係語言學後面同埋文化研究前面，諗住會多D人影好睇D啦，不過最後都失敗，MLC果張就淨係得一個學生同三個文研既導師，好odd。另一書院的MLC同學直情費事搞咁多野，連老師冇叫，影書院系相時，求其拿拿聲同院長影幅相就算。」