【國際】拳頭握實、馬步要穩──台灣農陣拆政府

台灣

擂台上面要打贏，多少要一D意氣。比人打中一拳爆嘴唇，就要抱住踢甩對方門牙既氣慨一腳伸返落佢塊面。一樣道理，抗爭要贏，固然要準備充足，但更重要既係呢股不平不甘既意氣。香港人「溫文」慣，搞場佔領中環都嘈到拆天，試睇下一海之隔既台灣朋友，點展現佢地抗爭既氣魄？

話說苗栗縣大埔里有四戶農民「釘子戶」，一直阻住地方政府起樓炒賣既鴻圖大計，自然係地方官員既眼中釘。今年7月18日，趁一班抗爭團體北上行政院抗議，地方政府突然推翻副總統吳敦義「原屋保留」既承諾，偷襲「拔釘」，600警員坐上民用遊覽車暗中接近，守護幾年既家園，短短幾小時內就夷為平地。

事情曝光，苗栗縣政府自然比人口誅筆伐，但縣長劉政鴻竟然話呢個係「天賜良機」，副總統吳敦義仲要回應：「哪有什麼說話不算話，9.9%以上都是確認的嘛！」

比人恰到上心口，反擊係天經地義。強拆事件滿月，台灣農民陣線發起抗議，晚會足足有二萬人參加，口號入面最搶眼個一句，就係：「政府拆大埔，人民拆政府！」有來有往，既然政府出到「火燒烏巢」，群眾就回敬一招「聲東擊西」。農陣先放話要帶2000人到行政院門口靜坐，但行經主管都市計畫審查既內政部大樓個時，眾人突然群起翻牆，強行推開大門，駐衛警措手不及，只好眼白白睇住大樓前廣場比千幾人蜂擁佔領。佔領係第日完結，地上牆上貼滿幾百張「拆政府」貼紙，又有各式巨型油畫。唔知官員行過時係咩野心情？

睇完台灣農陣既勇武抗爭，我諗起電影《打擂台》一句「唔打就唔會輸，要打就一定要贏！」農陣既行動距離目標達成，雖然仲有漫漫長路，但人地搏拳起碼招招到肉，心頭有火，被人焗住上擂台，都一定要打贏。咁我地既抗爭又如何呢？