校園散打

最霸氣的大字報
文：小熊

呢排行過文廣，同學可能會睇唔清楚民主牆上面有D咩，不過就一定見到Banner 果頭有個充滿氣勢的大字報，用四個banner位同你講一段說話，內容好似係斥責一個「鼠竊狗偷」，叫佢唔好咩咩咩咩咁囉。學生報見今次搞到咁大件事，循例都要詢問下發生咩事既，原先以為貼得大字報出黎，CCBA的同學應該肯講清楚件事既來龍去脈，點知CCBA對我地訪問的邀請卻係一個充滿霸氣既：「NO！」。Anyway啦！經過我地既明查暗訪，消息人士指，咁大場大龍鳳，原來不過係茶煲裡既風波，簡單黎講就係小朋友齊打交，打打下就玩大左咁囉。唔明就唔方便解釋咁多啦！最後循例呼籲下各位同學／各個學會，正如上期篇＜文廣困局＞所講，book左既場／banner位等係唔可以轉讓架（Shawband啱啱就比逸夫代表會列入觀察名單）！咁有計劃咁借人地SOC既名義去一次過book多幾個位就緊係更加唔啱啦！有霸氣都係咁話啦！

___________________________________________________________________________________________

埋黎睇！！！有關學院院務會學生代表選舉

根據剛修訂的《2010年香港中文大學規程（修訂）規程》15.6(j)，各學院院務會的成員組織須納入：由在有關學院全時間修讀香港中文大學學位認可課程的學生互選產生的學生一名。

就此，三月尾教務長邀請了若干學生組織代表開會，討論學院院務會學生成員的選舉安排。學生會幹事會將會在四月就該選舉規則，尤其是選委會的組成辦法向同學諮詢，有關日程將透過massmail和民主牆（學生會欄）通知同學。如同學想參看教務會有關「學院院務會全時間學生成員選舉規則」的諮詢文件，可上學生會網頁：http://cusu.hk

如有任何查詢，可循以下途徑聯絡學生會幹事會：
電話：2609-7201
電郵：cusu@cuhk.edu.hk
會室：香港中文大學范克廉樓地庫

___________________________________________________________________________________________

中大工程學院出路

文：BT力牆

恭喜中大工程學院成立二十周年 ，亦恭喜被譽為「現代半導體封裝之父」、「高錕第二」的汪正平教授成為工程學院新院長。

成為了新院長，當然要提出自己對工程學院未來發展的看法。最近汪教授與傳媒會晤時談到中大工程學院未來發展的方向，表示為配合中國十二五綱領中的科研發展[1]，將會把焦點放在六大新領域︰生物醫學工程學、能源工程學、網絡保安、金融工程學、納米科技和系統整合（電子與光電子封裝）。另外，亦打算在下學年將能源工程學課程列為工程學的主修科目，希望工程學院能夠在發展工程科技同時配合中國的需要發展，令香港的科研更上一層樓。

汪教授心懷壯志想攪好科研發展，但是香港政府每年投放在科研的只有十億元，遠比中國、南韓、新加坡、及台灣低。研發新科技需要大量資源，但是政府泵水不力，即使想大展拳腳，卻是有心無力。工程學院只好將一些研究項目搬到深圳發展，希望中國能提供研究資金。東莞市政府表示會支持中大工程學院前來發展研究項目，並會提供資金和土地給工程學院開發研究所。

看來，若要發展新科技不能夠再單靠香港政府了，是時候北上神舟搲資金了。

[1] 十二五綱領其中一些科研發展項目包括︰節能環保、新能源、新材料、電動汽車、新醫藥、生物育種及資訊產業等。這些項目正好與六大新領域相對應。

__________________________________________________________________________________________

徐揚生：副校長七號

文：小混混

話說中大喺三月一號開始又多咗一個副校長，佢就係之前做協理副校長嘅徐揚生教授。計埋佢，中大已經有七個副校長喇[1]。聽到呢個消息，大家可能即刻諗到兩樣野：一、佢究竟係邊個呢；二、協理副校長同副校長有咩唔同呀。

首先講下佢係邊個啦。徐揚生教授係太空機械人同智能控制系統嘅專家，係中國工程院院士，亦係自動化與計算機輔助工程學嘅講座教授。佢97年一入中大，就被委任做機械與自動化工程學系系主任。之後佢喺06年做校長助理（內地事務） [2]， 由08年開始做協理副校長，到今年就再升做副校長。佢同大陸，尤其係深圳嘅關係都幾密切，由08年至今係深圳市決策諮詢委員會顧問，亦係現任副校長中唯一來自內地嘅學者。可能因為咁，中大近年喺大陸嘅項目，包括深圳分校（校方稱之為深圳學院），佢都有份負責。

咁協理副校長同副校長有乜分別？一句講晒，副校長係大學主管人員，協理副校長唔係。就係呢兩個字嘅分別，決定咗前者可以參加決策架構之中最高嘅兩個會，即係校董會同教務會，以及AAPC（行政與計劃委員會），而後者唔可以。AAPC係校董會屬下機構，成員包括校長、副校長、書院、學院同研究院院長， 同埋幾個行政高層，加埋廿五人。由於校董會同教務會真係好多人，加上好多重要議題都要先經AAPC再遞上校董會討論，所以話AAPC係真正手握大權嘅機構都不為過。但問題就正正出喺呢度——AAPC入面嘅決策過程完全唔公開，而副校長、學院院長同研究院院長共十六人又係經校長推薦或者諮詢校長意見後委任嘅，真係黑廂同小圈子到爆。查實以前大學嘅行政權力係冇咁集中㗎，只不過劉遵義喺任內委任咗四個副校長（包括新增常務副校長一職），又喺一片爭議聲下將學院院長由教員互選變成委任制，咪話學生幾乎乜權都冇，連一個普通教員都越嚟越冇say。

不過，話說回頭，徐揚生一升咗做副校長冇耐，就代表中大同深圳市政府簽深圳分校嘅框架協議，成件事亦都可能只係中大想體面啲，由一個「副校長」而唔係nobody嘅「協理副校長」同深圳傾合作事宜，俾吓面佢哋啫。

[1] 現任副校長多來自理工學科，有三工兩理一醫一商。其實，副校長係點揀嘅呢，莫非理工人嘅教育、管理等知識同經驗特別好？
[2] 大家千祈唔好俾個括號呃，以為有好多個校長助理。查實徐揚生同期冇其他校長助理，喺佢做之前同之後亦都冇，所以小記有啲懷疑呢個職位係為佢度身訂造而設。