中大捷徑辭典

文﹕上山落山上山落山的妹仔
原刊於中大學生報 2014 年《迎新特刊》

中大咁大，由一個地方去另一個地方都有排行，一個唔覺意仲可能會盪失路。但其實有好多捷徑可以行，等妹仔介紹幾條路過你哋行啦！

［崇基/火車站去本部］
路線一：喺YIA度搭電梯，一路搭搭搭到去崇基啲宿舍度(文質堂對出嘅空地)，之後行花圃路(即善衡校巴站後面對下條路) 行去蒙民偉工程學大樓。入到去搭電梯禁9樓，一出去行幾步就到本部啦。

路線二：由 YIA 行到何草再行去善衡書院，之後搭五旬節會樓低座部lift去五旬節會樓高座，之後會見到一條梯，行上去就係本部。

［本部去新亞］
係本部圖書館出嚟，往煲底方向行到督督，再穿過醫學大樓，就會見到棟蒙民偉大樓（MMW），入去搭 lift 禁 7 樓（佢有個標誌會叫你禁8樓，千祈唔好信），行出去就係 NA。

［本部去聯合］
喺本部往圖書館方向行，行到盡頭會見到李兆基樓，搭lift禁3樓，行到去馬路邊之後轉右就會去到聯合校巴站。

［聯合去和聲］
行入聯合，右邊會有塊大草地，草地後面就係湯若望宿舍，呢間宿舍左邊隔離有條小路，行過去就係陳震夏宿舍啦。然後喺宿舍入面搭 lift 搭到最低層，一出去就係和聲宿舍啦。其實中大嘅捷徑真係數之不盡，尚待你哋去探索。嚟緊喺中大，初頭或者會盪失路，唔知邊度打邊度，但慢慢行行下就識路架啦。（利申：路痴）