文藝：加西亞般奴的手，在世貿。

加西亞般奴的手，在世貿。

文︰謙叔

本來拍大心口寫西甲專欄，可惜西甲戰將們已經進入冬眠狀態。本人興趣唔係波就係睇戲，前排大熱死純真情侶，解放香港人的嚴重壓抑的《戀愛夢遊中》絕對是話題之作。評價就唔敢當，但都是但講兩句我點睇這套電影，最膚淺地評價此片就是:「這是一場非常喜劇化的悲劇。」認真地評兩句，為求電影的故事連貫性和戲劇化的對比，如現實與夢成為真實與幻想的對比，犧牲掉的就是認真地處理夢與現實之間的關聯性，與及夢是否完全地能夠用現實的語言及語境反映及被解釋的問題。不想評太多，因為套戲個mood真的幾好，又好似幾抵佢叫座。忽然諗起睇過班雅明（Walter Benjamin¬）的一本日記式既論文（佢話拎去大學apply 教職，順便tribute to 佢條女喎），其中一篇講發夢，佢話其實人起左身會有一段時間仲發緊夢，咁歐洲人會成早餐呢個習慣其實係為左停止發夢，如果成日掛住發夢既朋友，大可一試。

講番正題，今次唔講西班牙波住，講講「賣非佛」電影明星之一既拉丁靚仔Gael Garc*'69a Bernal，亦即係《戀愛夢遊中》個男主角。先不談論佢拍過既戲，先講我對佢既感覺。話說上年（2005年12月）我與他曾有一段超近距離接觸，地點發生在維園，當時香港既最潮話題應該係「南韓暴民襲港」或者「WTO打到黎」，而佢就正正出現在維園反wto團體的帳棚中（見圖），當時有世界不同的團體圍聚在一起，討論全球食水私有化的問題。當時的他只坐在一角，帶著墨超，一臉鬍鬚，我初初只以為係一個普通拉丁靚佬。但都討論的最後，他拿著咪發言，英文相當好（當日大部份發言的都是英語相當難聽的西語系人士），我才認得他是加西亞‧般奴！會後他非常低調地與不同團體人士chi-chat，過了好一陣子才有時代雜誌記者找他訪問，當時我正與一名墨西哥叔叔傾緊查巴達（Zapitista）的事（其實那時我的認識只是Zapatista的名而已），叔叔叫我: 「你去問加西亞啦!」作為粉絲既我當然用盡我僅識兩句的西文問候佢及渣左一下手，佢既笑容同回應足夠令我一世難忘，但跟著佢就畀記者拉走了。回家翻查他的資料，才發現他在年少時曾參與齊阿巴斯省（Chiapas）的推翻軍政府的uprising。當然，那陣子的本地報章皆沒有報導他的名字。另一邊廂港人仍喜愛留在家中看「暴力屎尿屁」，梁款叫呢d做「與普及文化跳探戈」，我話呢d叫做「睇show還睇show，做野還做野，港人我至叻」。

如此巨星參與現實社會議題（還要不是做「秀」式），其實不足為奇。當然在香港我們經常不其然地神化了電影演員為「明星」，呢d全賴娛樂大飲茶所賜。然而，在香港，我們見到「藝人」介入現實社會隨了在娛樂版之外（連徐子淇結婚洞房都頭版，死未！），就只得反盜版、「阿嬌喊、成龍大叫反偷拍」、「反食狗肉」大行動中，在電影中有基（激）進都好，返到現實咪就係咁囉。香港地廿年前就講文化介入社會，有，但似乎撈極都撈唔起，或者現實與夢，不曾重疊。

電影與現實——加西亞．一套冷門戲．dot the i‧介紹番……下次啦。下次介紹番。