與電台對話

訪：V
文：峰

中大校園電台是中大的校園媒體之一，並屬於中央架構，與幹事會及報社合稱「中央三莊」。今屆電台自上任以來，曾經訪問校長、採訪六四晚會、直播七一學界論壇，亦會恆常直播中大學生會代表會的會議。電台未來亦計劃開設聲音節目及開拍更多影像節目，例如探索都市傳説的「聲．鬼」、協助中大同學拍攝 MV 的「音樂之軌」等。

（內容經重新整理，以下非真實對話）

逸：台長黃雋逸、Sammi：副台長黃心怡

點解會想上電台呢支莊？

逸：首先電台係一支中央莊，所以涉獵嘅範疇都會比較廣，譬如之前有機會同新上任嘅段崇智校長做訪問，呢啲都係中央莊嘅特別之處。第二就係，電台比較多元化，以前可能淨係得聲音節目，但係近幾年都會做埋影像節目。平時做莊務可以拍自己鍾意拍嘅片，想做DJ嘅又可以開聲音節目畀自己做。

Sammi：以前中學有玩Campus TV，不過嗰陣會有好多掣肘，譬如老師會限制我哋嘅製作內容。上到嚟大學，一嚟唔會有校方嘅掣肘，二嚟會多咗好多資源，所以我哋做嘅variety可以廣好多。第二就係本身自己讀政政，政治嘅嘢好似淨係得一堆人知，但係我覺得作為香港一份子都有責任去留意，所以都想透過電台——起碼喺中大——令多啲人關心時事。

電台嘅傾莊係點㗎？

逸：同其他中央莊一樣大概有10次傾莊（一般系會、興趣莊等多數只有三四次傾莊）。每次傾莊set一個topic，包含嘅範疇都好廣。一開頭主要係討論一啲政治問題，有啲人會覺得好chur，驚咗唔敢再嚟，但作為傳媒完全冇可能避免政治，所以起碼畀我哋諗清楚，原來校園電台唔可以唔掂政治。之後嘅傾莊就有啲技術性層面嘅嘢，包括點樣剪片、點樣拍好嘅片，同埋介紹下電台嘅器材。

Sammi：上莊會講返佢哋舊年嘅經驗，然後問我哋覺得呢種做法係點？咁樣取材好唔好？中間又會希望我哋思考，我哋嘅政治立場又唔同，想拍攝嘅方法又唔同，剪輯嘅方法都想唔同嘅時候，莊員之間可以點樣磨合。而家做咗幾個月莊務，我覺得傾莊都好重要，畀我哋有個磨合嘅契機。

剪片好似要有返咁上下技術，係你地自己本身識、上網自學定係有上莊開班授徒？

逸：自己本身識少少，最後一次傾莊都有教過最基本嘅剪片。但當然淨係得基本嘢唔夠啦，自己會再上網搵教學， YouTube咁多教學影片，要自學都唔難嘅。就算唔識剪片其實都可以幫手做其他莊務，譬如好簡單識落字幕已經可以幫到手。

Sammi：剪片嘅話，有時食飯望住叻嗰幾個莊員做，其實已經學到好多手法上嘅嘢，或者點樣去剪裁更好嘅東西、點樣去取材等等。不過就算唔擅長剪片，揸機唔手震呢啲都好容易上手。其實學吓學吓就會識，都唔一定要開班授徒。

逸：可能好多人因為唔識剪片就卻步，唔敢上電台。但就算技術嘢唔叻，都仲有好多方面可以幫到手。拍一條片事前要搜集資料，訪問又要諗問題，甚至乎拍條片又要 plan吓點present先唔會偏頗，呢啲其實都好花心機。

電台最初成立嘅時候淨係得聲音節目，但係近幾年已經開拓埋影像節目。你覺得而家嘅定位仲係唔係「校園電台」？抑或係類似其他大學嘅「校園電視台」？

逸：雖然我哋到目前為止都係focus喺影像節目，但係今個月（7月）已經積極籌備緊聲音節目，招咗班想做DJ嘅同學返嚟。唔係話因為「電台」呢個名所以要開聲音節目，而係本身自己嘅莊員都有想開嘅聲音節目。如果係類似其他大學嘅校園電視台，就真係唔會做呢樣嘢。我哋想涉獵埋聲音節目，所以「電台」呢個名都係搣唔甩。

Sammi：同埋喺傾莊嗰陣，我哋都發現有莊員都想講啲冷門啲、偏門啲嘅嘢，聲音節目就可以有長啲嘅時間傾吓偈，講吓啲冇咁主流嘅topic。平時啲片搏緊hit rate嘅時候，聲音節目就可以畀小眾聽吓佢哋想聽嘅嘢。

娛樂性質嘅片吸引到好多同學去睇，相反校政或者政治節目同學就未必有興趣，你哋會點樣平衡兩者呢？

逸：我覺得都係睇條片嘅內容係咪hit中佢嘅範疇啫。我都同意校政或者政治嘢係少啲人理，可能好多人喺Facebook就咁碌過，冇好仔細去睇條片。不過我覺得就算條片唔係hit到好多人，只要有部份人真係有興趣、會認真去睇條片嘅話，都值得去做。

Sammi：當係幫中大留低一點一滴，不論係為自己又好，為中大都好。譬如最近嘅劉桂標事件，其實都反映緊大學兼任講師面對嘅問題。同埋就算同學未必好認真睇條片，淨係睇少少或者碌過望到都好過對件事完全冇認知。我覺得我哋都有責任幫中大留個紀錄。