江嘉愉 (Alcina) 猶記得那天與爸爸在醫院宿舍外相見的場面。當天Alcina完成清潔後，走到宿舍樓下見爸爸。相隔兩隻手臂的距離，爸爸為她遞上一袋橙，叮囑她緊記要吃水果，然後就離開了。那是她在Dirty Team兩星期以來唯一一次與爸爸見面。
「當刻望住佢嘅背影，我明白當年佢要離開屋企人係好艱難嘅決定，尤其係我未結婚生仔，我離開我屋企人已經咁大感觸，我好難想像當年屋企有我、我呀哥同埋細佬，細佬只係兩歲，又有我呀嫲，上有高堂，下有細路，佢都依然覺得係值得嘅。」
Alcina的爸爸是兒科醫生，2003年請纓加入Dirty Team照顧沙士病人。當年 Alcina只有7歲，還是小學生的她因為不用上學而感到「好爽」，加上爸爸不在家數月，家中沒有嚴父看管就「更爽」。但日子久了，小女孩開始感到有異，詢問家人爸爸的行蹤。「後來我先知道因為有沙士，所以爸爸唔可以返黎睇我地。」
Alcina的爸爸當年更曾經交代身後事，因他曾為一名後來確診沙士的病人插喉，需要隔離14日。「喺其他日子，爸爸只會託媽媽或嫲嫲問我地有無乖、有無做功課。有一日爸爸特登打返黎，語重深長咁同我講，大個咗要點點點呀咁。」
加入Dirty Team這個決定，爸爸曾經力勸Alcina要再三考慮，甚至每日都會找一個原因嘗試說服她。「佢話『我都明，但你始終係我個女，邊有呀爸想自己個女行到最前架啫。』佢話自己諗返轉頭，都係一腔熱血，但其實當時已經有小朋友，退咗休嘅佢話如果依家再決定，當年嘅選擇可能未必會一樣。」
後來爸爸明白女兒的決心不易動搖，就在Alcina搬到宿舍前，爸爸將他自己當年在Dirty Team打仗時用的護目鏡送給女兒。「佢話『我都知你地有gear，但呢個sort of一個叫做平安符，畀你完好無缺咁出返黎』，嗰下我都幾想喊，都幾感動。」
「我同爸爸性格其實幾似，一旦決定左做一樣野，其實都無咩人可以動搖得到。同埋我地個樣都似。」她笑說。
實習醫生 江嘉愉 (MBChB 2019)