訪星屑／林偉聰後記：

訪問星屑，本想問問他如何打破專業人士刻板形象做抗爭。不過歐陽醫生眼中，這條抗爭路可算順利，沒遇上重大阻力。

驚訝之餘，忽然覺得，會不會是我們高估了所謂「行內」的壓力？星屑的例子其實是說，只要你睇唔到(not to percieve)啲壓力，隨心而為，在專業「行內」做番自己，原來都得噃？
＊＊＊＊＊＊＊＊＊

但隨心而為有實際條件。報章報導星屑「收入多過政治助理少少，即係有十幾萬！」。咁星屑嘅故事除咗說明經濟自主的確令人更有多行動力之餘，有無其他啟發？對比林偉聰的《壹週刊》記者故事，錢對林來講卻是牽絆，他口中吐出令人震撼的「錢太多令你返唔到轉頭」幾字。

兩隻故仔，星屑示範點樣搵到錢過中產生活，同時可能唔需要放棄原則、可以自由做反叛的事，一改一般人覺得「搞親社運就實乞食」的偏見，鬆動了大家對社運人的想像，說明反叛的成本可以比傳說中要低。

林偉聰則更為激越，佢其實係話，個啲你以為係成本嘅嘢（例如高薪厚職），其實先真正令你付出咗最重要嘅成本：生命、青春、夢想。佢喺訪問講咗幾次：「你一跳咗出去，感覺真係好爽架！」
＊＊＊＊＊＊＊＊＊

你可能覺得，林偉聰都係因為唔使養家，如果我阿媽等住我畢業搵錢呢？唔緊要，你可以睇埋後面幾隻唔同嘅故仔。無故事可以普遍(generalize)解決所有問題，但係喺你面前，眼見嘅其他出路一啲都唔少。

最後送上李智良在《房間》幾句：
「人生的選擇……不能平鋪直叙……不知道就是不知道。直面那無知附帶的不安，如何在提腿學步之前，忽然想到，跌親應該又唔撚駛死，並且，沒有流奶蜜糖之地這回事。」(頁72）