Chrissie信箱

Chrissie：

最近響新聞睇到有變性人爭取喺香港結婚。我都就快做變性手術。好細個就知自己係男人。聽到人哋叫我做阿女／小姐時會好沮喪。然後睇住唔屬於我嘅部位越嚟越大，隨時想、想死左佢。好多人以為我係TB。身邊無人明。你都唔會明。

想做手術，亦會想同女朋友結婚。就算俾醫生質疑都keep住覆診、好俾心機儲錢。好多有人話連我哋都結得婚嘅話，咁同性戀都結得婚，但唔生得就唔應該結婚，如果唔係會破壞大家對「家庭」嘅理解……關我咩事。我直架！我唔想生咩？我冇得生之嘛！

村中村上

村中村：

多謝你坦誠嘅分享…Chrissie知自己同好多人一樣唔知呢種「終身監禁」到底有幾痛；有人覺得呢種係身體與靈魂錯配嘅、何韻詩式「汽水樽裡的咖啡」，Chrissie又可能同你唔同：覺得自己嘅性別唔止男／女兩種，有D似《得閒炒飯》個講法，男女比例一時係一比九，一時五十五十，一時不男不女，隨時變、可以變。但係，Chrissie好喜歡你肯定自己所體認到、呢個屬於你嘅性別；好喜歡你為咗自己應得嘅自由而堅持。我們應該有可以互相明瞭的地方！

我有諗過「TB的特定標準係到底咩？」──都有人話過我係可愛TB！惟有落力啲解釋我點睇──「性教育」都唔會講。有時某啲傳媒笨蛋一見人短頭髮就叫人做「男仔頭」、「TB」，電視電影入面嘅女同志組合又往往是短頭髮硬朗女子再加一個長頭髮美女，咁樣嘅定型已經好傻～不過你都唔怪得佢哋，佢哋都好可憐，成世都以為世界上得男人同女人，對住比較特別的、無法分入去男／女界別入面的人就即刻手足無措。亦可能係佢哋俾人鬧得多，知道短頭髮都唔一定係先生，仲可能係直女，所以佢地先會叫你小姐，其實佢們都被困於「先生／小姐」呢個分類入面，所以先會出事。希望認識或者係想識你嘅人「高呢」啲，與其將人求其分類，不如同你傾兩咀，了解下你嘅睇法！又或者下次你遇到叫你小姐嘅人，停落黎同佢吹兩句性別101，當係同佢上下堂，等佢下次冇咁容易叫錯其他人。

至於「咁如果變性人有權結婚，下一步就係同性湧出來爭註冊，咁樣會破壞婚姻，引起好多社會問題！」──車！所謂的社會問題來來去去咪就係冇得生同埋破壞倫理，依家果單變性人官司，政府個律師竟然話生兒育女係婚姻定義，咁唔生同生唔到果啲異性戀夫婦點算，全部唔係婚姻？好心佢哋唔好淨係諗住人哋啲性徵，將人類簡化成陽具同陰道，當其他嘢透明，係咁講破壞婚姻、社會問題……就算真係冇得生都可以領養架嘛，而且外國都有唔少同性戀家庭，仔女叫兩個家長做爸爸／pa爸、媽媽／媽ma咁樣啦，或者索性叫名，都不知幾溫馨，分分鐘仲溫馨過唔少異性戀家庭tim ar！

Chrissie