中大校巴辭典

文：車公

教學日日間穿梭校巴（新亞）：口訣係「正、三、六、九」，即由9時起每小時的00分、15分、30分、45分都會有校巴從火車站上新亞。同時間都有車喺新亞開落嚟。教學日日間穿梭校巴（逸夫）：口訣係「正、四、八」，即由9時起每小時的00分、20分、40分都會有校巴從火車站上逸夫。「一、五、九」就有車從逸夫開去火車站。

轉堂巴：為方便同學轉堂而設，時間表相當複雜，有時是每小時的18分開出，有時是50分開出，有時是10分開出……簡單來講就係，你落堂行出來，好彩見到有車就搭啦……見到條龍無人，你就知走車喇。

夜行校巴+尾班車：晚上亦點後所有車正、四、八從火車站開出，先上新亞再上逸夫。晚上11點25分。錯過左一係就行上山／搭的士，一係就企喺度喊啦。

順風車自救：上年UC推出教授順風車畀同學截，不過校內好少見到喎。同學都可以截其他車種，好多私家車、貨車都會載學生。慢慢令全港司機都知道中大校巴唔夠要靠外援，都係一個加速服務改善嘅方法。

迫巴士：獨有中大氣息的集體遊戲。適合多人一起玩。玩法：在地上畫兩方格，參賽者分成兩組，各自擠入其中一方格，迫得入最多人的組便贏。聽說秘訣是細粒的同學迫晒入中心，手長又大力的同學在外圍將手伸到最長攬住大量同學增加人數。這個遊戲是破冰好玩意，因為男男女女攬完一輪又出汗又大嗌，唔熟都變熟。這可能解釋到點解整體中大同學關係都相當好，可能都係因為平日一齊迫巴士日子有功之故。

吉車：有時你等左好耐見到架巴士終於來喇，衣？唔載客走左既？無錯，呢個就係中大既神秘吉車，會係山上行來行去又唔載人。《學生報》曾追問空車問題，交通組不肯提供每日空車數字，稱司機係去放飯，又答應以後在車上加上說明牌示意「放飯」，不過梗係無左件事。如果有同學拍得照片校巴有「放飯」告示，請交來學生報，可獲神秘禮品一份。

強記巴士，或校巴司機福利問題：強記巴士是中大為了解決校巴不足問題而外判的巴士服務。車身為紫色，較寬敞，司機有型有款風情萬種，不時播放《多少柔情多少淚》等歌自娛。每架車還有不同的裝飾！大家可多多留意。不過聽講司機福利唔多好，與中大司機待遇有別，不過未有具體例子，大家可多D同司機傾下計，知道下佢地既情況。Facebook還有「中大校巴司機關注組」和「中大校巴服務關注組」群組。

交通組：位處西邊校門（即四條柱）保安組辦公室，既下面。平日大家可找他們傾下計，唔知下班校巴幾時到可以打電話問下：2609 6000 (中大總機，請轉駁交通組)

「巴不得」事件：幾年前大學突然在無諮詢下實行校巴收費，同學出示學生証可免費上車，校友、外判員工或市民（甚至應邀入中大教書的guest speaker！）就要支付$3車費。同學舉行多次校園行動反對措施令基層外判員工百上加斤，後來中大更被同學揭發校巴牌照根本不容許收費，原來收錢是違法，才停止措施，但仍保留早上在火車站上車查學生／職員証。

巴士迷：校巴都有巴士迷！連型號都有記錄。自己睇：
http://www.qbusfile.com/cu/cu.htm

「經費不足」，又稱一筆過撥款餘毒：每次開會同學要求改善服務，交通組總會解釋因為大學的一筆過撥款令他們經費不足，不可能長遠計劃校巴服務。不如下次搵啲校方高層搞次「步行校園籌款」，請佢哋親自由火車站行上新亞，一來為交通組籌旗，二來感受下個步行校園「運動」幾咁健康？

三改四宇宙大爆炸：學制三改四後學生人數倍增，如題。到時點算？Welcome to the desertof the Real~~

校園交通服務諮詢委員會：學生有份參與的校政意見組織！同學可成為學生代表，向交諮會索取資料及表達意見，要求改善服務。唔好得個怨字，一於加入親手爭取啦：同學可向學生會報名，由代表會正式委任成為代表。
查詢：26036404（學生報）或2609 7201 （幹事會）