今鋪輪到我做莊

文：奧奇特

莊，即系會院會屬會學生會宿生會代表會籌委會。上莊就是成為上述組織的幹事。咁多個莊，參加哪個，上哪種才是適合自己，不會虛耗時間心力呢？趁未正式開學，都係做下準備好啲。

系莊係…
系莊，就是貴系系會的幹事會，本質是作為學系跟同學的溝通橋樑，把同學的意見反映到學系，改善教學。同埋，起增進學術氣氛作用。但今時今日堅持使命嘅系會已好少。你一入學就收會費，冇得走雞。收左錢就搞啲個個系都搞既開學飯春茗糖水會競技，盲樁樁可能食錯隔離繫個餐開學飯都唔出奇。（開學飯來來去去都不過晌中大飯堂食之嘛！）

有心機的系會偶爾會舉辦書展、賣物會、做展板，算有交待。系莊要在新學年開始前籌辦學系迎新營（細Ｏ），下學期為畢業的前輩紮波波橋訂花買香檳噴。向畢業的前輩送舊送花係想他們留下最後的美麗回憶，但紮波波橋傳統是怎樣來呢？咁做作嘅人工背景係咪必要呢？如果你有意晌系莊做幹事，記得諗一諗點解，唔好上屆莊話要做就跟住做，而上屆莊冇講冇諗過舉辦既讀書會座談會學習成果分享會，就諗都唔諗呀！

西‧莊
AIESEC（國際經濟商管學生會）、投資學會的莊員，予人一種由頭suit到落尾的感覺。由傾莊、諮詢、影莊相、就黎連成莊食宵都要full suit見人。他們提供很多機會讓會員接觸以商界人士為主的mentors，間中同mentor食個飯嗲一兩句。如果你決定呢世都會留在這個商業範疇打滾，上一上呢類莊，裝一裝身，伸一伸隻腳入職場，都得。不過，用咁多時間去著住黎緊二卅年都除唔甩既緊束衣，辛苦左啲喎。大學職訓重未夠？再要逼自己預早走進黑色皮囊都幾唏噓。

興趣莊，給有興趣的人去join
「大學不只是讀書的。」那麼，就要找些事幹搞搞。興趣為先的屬會有幾十個，天文武術攝影動漫電影棋藝劇社…跟志同道合的同學一起籌備活動是一件樂事。就算唔上呢類莊，齋做member都可以有好多野玩，有啲包你中小學幼稚園從未接觸過，等你慢慢發掘。（自創一個中大前所未有嘅都可以）

會走出校園的學生組織
「大學生應該關心社會」，你可能認為自己已經好關心社會，例如每日睇電視新聞、速讀坊間報章、「蠟」下Yahoo新聞標題。但係關心唔代表得個知字。中大有社會服務工作隊、基層關注組、國事學會、吐露詩社、綠色天地、逸夫奧比斯等，持著理念以不同的方式介入社會事務。大學生年輕力壯，讀書同玩之餘，透過參與學生組織去親身明白社會運作點關自己事，先至冇白交四萬幾學費。唉，其實點只呢啲吖。中大每一個系會屬會都可以係關心社會既學生組織黎架！

禿頁莊、日音莊
上少搞野既頹莊呃宿分好常見，頹莊全年最多得四個活動：O-Night、藝墟攤位、傾莊和成莊食宵。重有隻叫暗莊，連收會員都慳返。咩莊好頹？講到呢到我頽左……你自己估下啦！

短莊？唔駛驚！
實際上，大學本科生手冊的學規沒有規定學生一定要上莊。唔想用成年時間上莊，但又想搞下活動，可以考慮成為一些較短期活動的籌委會幹事，也就是上短莊。短莊包括中大和各書院的歌唱比賽籌委、各書院的迎新營籌委，以及書院內的大型活動籌委等。短莊花的時間較短，上幾個短莊，可以接觸的同學會更廣泛，值得一試。

無上莊
大學咁大，有好多設施例如Gym、泳池、圖書館、球場可以任用，趁人地上莊既時間用盡佢，又可以晌林蔭大道樹陰下乘涼睇下書，幾好！

無論你之後上左甚麼莊，上左幾多支莊，其實都沒甚麼所謂；沒有上莊，也沒有甚麼損失。這是大學生的自由，是你的自由，你享有自由去運用你的自由。

同場加映，宿生會和走讀生舍堂都是莊，分別讓宿生和走讀生及宿生上的，不錯看。宿生都可以上走讀生舍堂？係呀！