紙決定未來

文︰Czior

我好認真咁當大學係一個生存遊戲咁玩。

為左自己前途著想，所以從入大學開始，面對讀書、人際關係、實習交流的態度，都會說服自己呢啲多數係為左幫助自己增值既任務或工具。即使個人時間規劃都必需以較功利的角度出發，將興趣嗜好拋諸腦後，只因時刻記住長輩的一句建言——最多都係辛苦多三年啫。

結果如何？冇花時間去上無謂莊、冇去參與果啲乜野破壞社會秩序既社會事務、去左一個SEM日本交流、搵左一個高薪科系出身既女仔拍拖、去左幾間大公司做INTERN汲取經驗……到最後我都尚算唔錯咁GPA有3.6，囉埋個FIRST HON咁日語主科畢業。有一刻真係以為跟足哂個遊戲黎玩，乖乖仔仔咁有乜都忍一時平風浪靜，唔違反任何禁忌同規則，自己前途就可以一片光明。原來只係暴風雨前夕總是平靜既假象。

但直至畢業前數月開始準備履歷表（即CV）果陣，我先發覺對「工作」所謂何事，仍然毫無頭緒。回想起我中學開始既各種兼職生涯，夜晚返到屋企總會有意無意地宣告著身體或精神既勞累，然後係麻雀雖小、五臟俱全的家安安樂樂咁囉起餐桌上早已預備既晚餐去填飽個肚。而我惜字如金既父母一般都唔會特別同我講啲乜，但係佢地隔冇耐就會再講︰「到你真係出黎做野果陣就會慣」。

到底「工作」可以代表乜？果陣我僅僅可以連結幾個關鍵詞︰工作、薪水、生存、辛苦……而呢幾個簡單得可怕既詞語，就成為左支撐我係呢個三年遊戲中掙扎既最大動力，令我不知不覺地習慣——係成績上又好、係實習同Exchange既選拔當中亦好——盡力咁去以己之長，擊敗其他競爭者。為左得到我想要既結果︰盡可能準備好所有有價值寫入CV既證明同證據。到依家……只係多左一個關鍵詞︰金錢的奴隸。

原來我一直被教導、被引導走到最後既真正結果，係完成左一份「我是一個怎樣的奴隸」的自我介紹。彰顯自己的生產力和勞動力，並學習無視任何個體的獨特性質，而睇我CV去決定請唔請我果個某人，睇中既亦只係眾多可以換算為生產價值的能力集合體。而我到底個性是如何，如果不直接影響工作，有需要理會嗎？

砌完份CV……先發覺原來自己已經企喺下一個起點。係呢一刻，過去所有既累積都濃縮左係呢張紙上面，而這一切都只不過化為動力源去推動下一個遊戲的運作。