移動的藝術──訪問香港飛躍道協會

訪問、撰文：Ena、開心小跳豆

同學或者未聽過Parkour，但如果話一班人晌唔同建築物之間跳黎跳去，又或者好輕易就跨過欄桿，唔知大家有冇印象呢？好多人都會覺得呢種運動好有型，但原來玩Parkour呢種運動，除左「型」，仲有好多辛酸史架，好似俾人誤解、遇上練習低潮等等。今次中大學生報就訪問咗香港其中一個Parkour組織，飛躍道嘅兩位成員兼教練。

從Assassin’s Creed、合氣道到Parkour
受訪者之一Alex，當初係因為玩電腦遊戲Assassin’s Creed（刺客信條）「見到個男主角就係用Parkour去玩，覺得呢種運動好型。跟住上網search發現有飛躍道呢個會。」Alex已經玩左接近兩年，問到佢有咩動力繼續玩落去，佢話除左好有成功感之餘，「同啲朋友一齊玩，覺得好有感覺，種感覺……都唔識點講……嗯，好熱血！」至於玩咗三年嘅阿樹，之前因為玩合氣道嘅師兄拉埋佢去試玩，佢話練習時不知不覺就好攰，估唔到會消耗咁多體力。上網睇Parkour嘅短片，都唔覺得呢種運動原來對體力、肌肉有一定要求，因為入面啲人好似好輕鬆就跳過啲障礙物。

跳黎跳去想點先？
Parkour本來係一種逃生嘅方式，八十年代晌法國興起，簡單黎講，就係點樣最快由一點去到另一點，訓練肌肉、練習不同技巧去跨過障礙物，例如欄杆、高高低低的石壆等等。阿樹講到訓練嘅時候，初學者首先要學點樣「survive」，即係最簡單嘅克服障礙的方法，之後先至會加強動作之間嘅連續性，再進階啲嘅可以學習加強動作嘅力量，例如點樣再跳遠啲同高啲。阿樹話自己就鍾意加強練習動作嘅流暢度多啲。所以即使係「進階」都有好多不同方面。

訓練內容除咗係對身體的訓練，同時亦係對參加者心理上的訓練，要學習點樣評估某個障礙物自己過唔過到，同埋點樣相信自己有能力透過練習去完成不同動作。所以飛躍道唔贊成用Parkour黎比賽，因為佢地認為Parkour如果變成比賽項目，會形成一套標準，咁就阻礙咗不同人嘅進步空間，而且有機會帶來不正當訓練。而Parkour晌法國同英國都算係比較成熟，亦有好多「明星」出現，「明星」嘅動作可能係好有自己風格，或者好有力量，令到世界各地其他Parkour人會「朝聖」，即係去番法國或者一啲明星玩過嘅地點試玩。

飛躍道每星期練習兩次，地點通常係公園，「但係而家公園嘅設計會諗安全多啲，要小朋友做嘅野越來越少。」例如以前會有啲不同形狀、設計嘅設施，唔會一望到就知點玩，要小朋友發揮創意，諗下點樣玩，同埋不停創造新玩法。例如以前就咁放個鐵架、韆鞦，已經有無限玩法。但而家公園嘅設施就會有過三關、算盤等等唔需要去公園玩嘅野。咁佢地最鍾意去邊個公園練習呢？阿樹覺得美孚公園係幾好嘅練習場地，「少人同埋有高有低，又有啲壆俾我地，幾多野玩。」Alex就話九龍公園「夠大，唔同程度都有野玩。」

點解唔俾？因為唔俾囉！
不過，佢地要搵場地練習都唔容易，就算晌公園練都會俾人趕，「但夜晚少啲人，就會tolerate啲。如果去尖東海旁好快就俾人趕，佢地好敏感呀呢啲野，話影響到遊客……」海旁咁大，點影響到遊客呢？「其實係啲保安會覺得你晌度整傷我要孭鑊，即係其實佢地唔係好concern你。或者佢simply覺得你係唔可以咁做嘅，個理由就係你唔可以咁做。」阿樹亦提好耐之前就試過因為一大班人晌九龍公園Jam動作，管理員覺得「你地太多人」所以報警，要負責人去落口供。

誤解之後
近年越來越多人識同埋參加Parkour，以為佢地成立飛躍道呢個組織，係為咗推廣Parkour，點知要從傳媒同大眾對佢地的誤解開始講起。阿樹話外界嘅人「好鍾意睇你跌親，普遍睇法都好負面，通常都係啲負面新聞。」甚至會認為玩Parkour嘅人只係一班街童。所以當初成立飛躍道，就係唔想俾人當係一班唔知做緊咩嘅人，「有個group，我地係有正式嘅recognition。或者你自己話自己專業嘅係唔得架嘛，要有啲名堂呀咁，會好啲，好過就咁講我地玩緊咩。」

亞洲電視曾經訪問佢地，仲搵啲醫生出來「點評」玩Parkour嘅人，「話呢個斷骨，果個又點樣。」其實玩咩運動都會勞損、有機會受傷架喎，點解平時訪問足球明星又唔話佢地日踢夜踢都好易斷腳？個訪問又引用一篇網上假帖，話玩Parkour有好多死亡個案。另一個對佢地嘅批評就係「破壞公物」，因為佢地成日跳上爬落，「俾普通人使用設施多好多」，但佢地話因為咁反而會更加愛惜公園設施。其實要晌香港搵地方練習咁難，佢地都唔會整爛啲野黎減少練習機會啦。

飛躍道成立於2006年，不定期舉辦訓練班。佢地主要以訓練為主，偶爾都會表演。最後問到佢地玩Parkour又唔比賽，又好少表演，咁日常日活會唔會用到，佢地話有時要追巴士，或者唔想兜路都會跨欄杆同石壆，快啲嘛！
訪問、撰文：Ena、開心小跳豆

飛躍道歡迎有興趣人士試玩同加入訓練，詳情可以用寄電郵去hkpa.hkpa@gmail.com查詢，亦可以去http://www.parkour.hk/或者去Facebook搵HKPA。
想認識多啲，都可以上網搜尋相關影片黎睇，阿樹就推介咗David Belle嘅片同埋Daniel Ilabaca嘅《Parkour Tour》。