校園｜週會，去來做乜？

唔知同學有無諗過quit書院週會？

畢竟大家都係成年人可以有所選擇，「肥」左週會又點啫，成績表上Assembly一欄寫著「FF」又唔會令你搵唔到工，甚至唔會影響你攞船嘅機會。諗真啲，「肥」左又真係唔使死架喎，仲慳返啲時間，唔使下下趕頭趕命落堂入Shaw或者落山。

話時話，書院究竟點解要有週會？你又去來做乜？

聚首一堂等落堂

目前來講實在好難考究「週會」係點來嘅，因為佢幾乎係自有永有，亦無乜文獻講過中大各書院幾時開始有週會。不過，週會其實係每個書院嘅通識項目之一（即係書通），雖然不佔學分亦不設考試，不過聽講一定要及格先係書院畢到業。

週會既為書院通識教育課程一部份，好歹係中大書院特色之一。傳統四間書院都希望同學可以透過週會擴闊視野，同埋凝聚書院氣氛。譬如聯合書院嘅網頁就話想「加強同學和書院的聯繫」，新亞則希望「增加（同學）對書院之歸屬感。」

不過咪玩啦，幾個星期坐埋一次仲要個場面咁多人，點凝聚歸屬感？呢個目標似乎行貨左啲喎。唯一比較可能發生嘅反而係，完左週會之後同學自己次次都有大小組聚啩？咁就反而真係比到同學機會定期見返同書院既師兄師姐或者朋友勒。

咁扣左「聚下」、「見下朋友」，書院週會仲有咩意義？

有受訪同學分享，既然週會唔計分又唔考試，咁即係書院方面其實都唔要求同學記得或者知道週會嘅內容架啦？咁同學入到去玩手機、訓覺、睇雜誌，或者衝擊台上嘅嘉賓…你都好難怪人啫？崇基嘅同學仲特別有小學雞感受：傾偈要收學生証？！

不過講番轉頭，又係咪下下都要考試計分先去做先？雖則大學嘅氣氛基本上都係保守反動，做學生嘅都可以有獨立思考啩？書院一片好心，設計左好多題目比大家揀，有啲書院例如逸夫，更提供替代選擇。目前逸夫同學可以選擇去High Table（每次約一百人）或者High Tea（每次約五十人）代替其中一兩次週會，如果你又真係唔中意著晒suit去食餐高桌晚宴的話，亦可以去足三次週會，唔算無選擇，不過就要鬥快登記到——咁變相証明：呢啲替代嘅飯局，又幾受同學歡迎喎。出年逸夫仲會以藝術為題，主打請藝術家做分享，講下佢地選擇從事呢個「非主流行業」嘅心路歷程，希望比到同學一啲另類睇法咁話。

自主小學雞

咁頹去週會殺時間take attendance係一種選擇，「肥」左quit左週會亦係另一種選擇，第三種亦都可以係珍惜書院花左嘅資源，比啲心機聽下嘉賓講咩。網上查得番崇基過去幾年嘅週會題目，唔少都幾爆吓，例如請過程翔來講中國、阿虫講來畫、My Little Airport 嘅阿 P來講音樂等等。而且你又未必要好認同啲嘉賓嘅意見家嘛——比如最近就有崇基同學比週會嘉賓激親，當場出去問完佢問題返到去仲係頂住條氣，結果兩位同學寫左篇文講下自己不滿（見表）。不過老實講，啲同學都幾有心機噃；老師亦有聯署回應同學意見。

講到底，其實係大家心目中，中大書院嘅非形式教育係咩野一回事？在彈性與選擇、自主與小學雞之間，相信大家會搵到自己嘅答案。
///////////////////////////////////

書院點樣定週會題目？

其實都幾民主。書院一般會有個委員會，會員包括教授、同學等等，一齊傾下出年書院有咩題目、搵邊個來做嘉賓咁。

唔少書院都有問卷比同學填，問下你覺得週會點搞，不過就唔多有人知書院係點處理或者理解問卷既數據。譬如話聽講崇基同學成日都係問卷入面抱怨週會次數太多喎，但係崇基都係無減少到週會既次數。算唔算意見接受行動照舊？好難講，因為又無理由啲問卷問到乜就乜架？書院作為教育機構，都要幫手判斷下點做係為學生好，可能佢地覺得前四後三去足七次先至做到週會既教育目標？小記無資料、唔判斷。

///////////////////////////////////

週會尷尬事件簿

有同學在答問環節向政府官員大叫「平反六四、釋放劉曉波」口號。

有同學不滿講者黃重光醫生，在週會狂推銷他的「ICAN成功法則」，覺得有違書院的「體會、理解、苦難」精神，撰文〈告崇基同學書－－兩位崇基學生回應黃重光醫生的聲明〉批評；書院方面，則有老師聯署回應，張貼在眾志堂。

前警務處長李明逵被同學當面問及警察濫權問題。

唐英年以以《領袖——包容的藝術》為題演講，被學生圍轟對民氐問題一無所知，一度面黑。