書院介紹

揀揀揀，升中時要煩讀咩中學，入到中學又要揀讀咩科，中六放完榜先揀完大學同major入到中大，仲要揀書院！？

其實中大所謂嘅書院制，雖然講到書院係唔同文化匯聚埋一齊塑造中大面貌，但其實各書院幾廿年前畀中大收歸權力之後，自主性已經名存實亡，行政權利狹窄，就算書院有理想有傳統，書院方面都難以有所作為。依家嘅書院大多只係搞下學生活動，提供宿舍、運動等設施，同埋俾獎學金同去exchange嘅機會。

書院固然有其獨特文化與精神。但依家新生揀選書院嘅方法，都不過好似找錯處，相同之中找不同，即係宿位、獎學金、 Final Year Project、 canteen等分別。

點都好，就等我哋逐間介紹啦。

全宿共膳
五個新書院之中，三間有「全宿共膳」既制度。

所謂「全宿共膳」，代表所有同學必宿四年，學生每星期有三晚要聚埋一齊「共膳」。感覺有啲奇怪？基本上想像下好似 Harry Potter 咁就 OK。

有人話每個星期有三晚要共膳，好似會無哂自由？嗱，理論上就無人話你一定要去哂食咁多餐，不過呢，錢就一定要交足嘅。同埋每次共膳都會好似上堂計 attendance 咁囉（唔會話你聽可以叫 FD 幫你拍卡當食咗）。

崇基學院 CC

崇基學院位於火車站隔離，係中大最大規模、唯一有宗教背景（基督教）嘅書院，仲有棟禮拜堂添。如果對基督教反感新生被編入崇基，可以係指定時限內申請轉書院。但講真，宗教元素佔書院生活唔太重，無需過分擔心。

崇基有十間宿，宿位最多，只要新生申請多數都有宿住，之後幾年都有一半機會住宿。崇基嘅舍堂文化相對濃厚，十宿都各有自己嘅文化，宿生都好投入於聯宿活動（傅盃）。

崇基特別多 canteen，包括清真、蘭苑同提供宵夜至凌晨兩點既眾志堂，但崇基既美食又點止少，其他嘅 8 間崇基入面 canteen 就有待大家慢慢發掘喇。崇基學院派獎學金就派得最多，每年有幾百個唔同項目畀同學申請，所以唔少學生都會為咗拎獎學金而入崇基，但大部份獎學金都著重成績表現。

書院通識方面，崇基週會數量係咁多間書院中最多嘅。不過，週會既嘉賓講都唔會太沉悶，之前就請過《黑紙》創辦人阿 Bu 和林日曦做嘉賓。

聯合書院 UC

聯合院就真係樣樣都有齊，相傳係全中大最快嘅電腦室——天機電算室；全中大唯一嘅酒吧——思源館⋯⋯如果同學無咩特別心水，揀聯合書院就最穩陣啦。

聯合個位雖然唔錯，無論行去本部、新亞定校園北部都幾方便，平日經過嘅穿梭校巴路線有 4 條，但因為係山頂嘅尾站，有時都會遇到校巴滿到上唔到嘅問題，可能要行過新亞等車。

獎學金方面，如果你係「全家第一個大學生」，都有獎學金俾你申請，種類都咪話唔多元，但係金額上就比崇基少啲啲。GPA 如果無咁高話，不妨考慮下 UC Goal Exchange programme，去嘅地方唔少，仲可以 exempt FYP 添。

新亞書院 NA

是咁的，每年有唔少同學希望入新亞，都係因為人文精神。歷史上，新亞係比較重視傳統文化傳承，今時今日都聽過唔少人話感受到新亞有較多人文氣息同歷史感，亦有人覺得俾人呃咗，究竟係點就交由新生發掘。新亞的確有比較多中國元素，例如書通選修課程有中國藝術欣賞同戲劇欣賞。得閒行過合一亭睇下風景，思考下天人合一嘅境界都係唔錯嘅享受。

新亞去邊都幾方便，搭校巴實有位，又可以經 MMW 行落本部。新亞 canteen（ NA Can）嘅名物紅豆冰亦都不得不提：大大杯都係賣 6 蚊，而且下午茶質素亦非常好(正餐就難講啲)，好多喺聯合上堂既同學都會落堂過 NA Can 食嘢㗎。

宿舍方面新亞住宿都幾難。不過新亞有「臨時宿位」計劃，俾同學可以揀三個人住兩人房。「四年一宿」既制度亦確保同學四年內會有一年宿位。值得一提，有間宿叫紫霞樓，坐擁無敵海景，不過抽唔抽到就聽天由命啦。

新亞同學唔駛做 final year project，但係有 STOT（「學生為本學習」的英文簡寫，只有崇基與新亞同學需要修讀）要上，獎學金唔係少，但係相對冇咁易拎，有啲要同學寫一篇有關中國文化嘅論文先攞到。

逸夫書院 SC

逸夫書院係中大第四間書院，於 1986 年由邵爵爺捐錢成立。逸夫嗰頭得一兩個課室，所以除咗書通之外，大家都無咩機會要留係逸夫上堂，所以亦有「逸夫走讀做咩要返 Shaw」之說。逸夫相對其他書院係偏遠咗少少，所以宿生出人多數都搭校巴。好彩一個鐘內都有 9 班校巴經逸夫，所以要喺中大四圍去都唔會太唔方便。

一年級同學基本上只要有申請就有得住宿。不過如果之後想繼續住就難好多。唔算住得偏遠嘅同學，上咗孖莊都未必有得住。逸夫書院都有類似新亞嘅臨宿計劃，宿舍管理亦較寬鬆，真係想住總會有特別嘅方法。

逸夫嘅獎學金相對著重活動，項目數量同金額都可觀。至於書院通識同週會方面嘅題目新鮮，鍾意文藝嘅同學可以喺某些書通課程中參與戲劇製作。

逸夫除咗無圖書館之外，其他設施都無少到。值得一提，全中大得兩間 BAND 房：逸夫同龐萬倫學生活動中心。逸夫嗰間當然唔係逸夫學生先用得，不過近水樓臺先得月嘛。

逸夫仲有一本屬於自己嘅學生報—— Shaw Beat，如果大家有幸入到逸夫，記住留意一下啦。

和聲書院 WS

和聲以「和聲beat」享譽全城：「和盡天地風雲之聲」喺大專界無人不識。除此之外，和聲cafe係中大少有專食甜品嘅地方，各位記住唔好錯過啦。和聲上海菜雖然有少少貴，但性價比其實幾高。

和聲書院位置偏遠，不過去聯合其實只要搭部穿梭 lift 就得，行過對面都有巴士站落山。宿舍方面，因為和聲係新書院，宿舍當然又大又新，但係嚴密嘅宿舍保安系統亦都係一大「特色」，出入宿舍要好以搭地鐵咁拍「和聲卡」入閘。有同學曾經喺民主牆表達不滿，但院方梗係無動於衷啦。

晨興書院 MS（全宿共膳）

晨興喺新書院中規模較細，得 300 個學生。晨興非常著重國際氣息，會招收較多內地生及國際生，甚至連書院院長都係外國人。當然，由於學生來自世界各地，書院通識課程會以英語為主。

晨興嘅宿舍算係中大之中數一數二靚嘅，木造嘅地板、寬敞嘅房間，有部份甚至有無敵吐露港海景（地產廣告tone）。如果同學想揀返間心水靚房，記住留意自己共膳嘅 attendance 啦。

敬文書院CWC（全宿共膳）

用兩個字形容敬文書院，就係「好 X 遠」，不過書院有足夠設施，自成一角，自給自足。宿舍據聞又新淨又好似酒店房咁靚，冬天仲有暖氣開添。

Canteen 水準不過不失，唯一缺點就係貴咗少少。仲因為書院地理位置倔僻，少不免有啲焗住食嘅感覺。

獎學金數量與和聲差不多，但設有一個 $50,000 嘅創意獎學金，都係鼓勵同學積極創新。

位於 39 區旁，步行來往本部同敬文，分分鐘要半個鐘。雖然校巴隔唔夠 10 分鐘就有一班，不過上堂趕唔到校巴都要做下運動㗎喇。講到做運動，其實敬文有單車徑連接火車站，踩 5-6 分鐘就到火車站。

伍宜孫書院 WYS

伍宜孫位於和聲同Shaw中間，話近唔近，但話遠又唔算好遠。所以要落山嘅話，大部份同學都會行返落逸夫書院搭校巴。伍宜孫都算好食好住，又有宵夜賣又有甜品屋。

書通一般由人文政治學科嘅老師教授，聽聞會用「創新」嘅角度講解，都幾有趣，例如探討下點解有精神病嘅人特別有創意咁。

獎學金方面，伍宜孫其實唔算太多，而大部份都要同學展現到創新精神或者創意行動先攞到。另外仲有一個$20,000嘅創意基金，申請詳情請自行瀏覽伍宜孫網站。

與逸夫一樣，伍宜孫都有一份屬於自己嘅學生報，名為 Sunzine。

善衡書院 SHO（全宿共膳）

善衡書院地理位置非常優越（又地產廣告tone），所有上落山嘅校巴都會經過善衡，行去本部或火車站都係 5-10 分鐘嘅事，上堂做 GYM 定食飯都非常方便。

善衡非常著重「家的感覺」，除全宿共膳外，院長亦會同同學一齊住喺宿舍，而每個同學都要出席書院迎新營。第一年嘅書通，同學都要入 camp，紮下營撐下艇，都幾溫馨㗎。

在獎學金方面，善衡喺新書院之中算非常慷慨，據聞幾睇重成績同埋學生對書院嘅貢獻。較特別嘅係，善衡有一個為醫學生而設上限60萬嘅獎學金，相傳善衡亦因為咁而有較多醫科生。

各書院詳情