【校園】畢業禮唔係咁簡單架！

文：松

話說喺十二月一號同十六號，頒授學位典禮都分別喺百萬大道同埋Sir Run Run舉行，係近幾年首次將個中大畢業禮拆做兩日而係特登開一日頒俾榮譽博士（見附表1）。難道有其他不可告人嘅思慮……？

十六號嘅畢業禮喺Sir Run Run入面舉行，學位只頒授俾博士同榮譽博士，咁樣將個場地轉移至室內，未免會有想藉此保護啲榮譽博士同埋主禮嘉賓，欲排拒抗議聲音之嫌。咁樣做，會唔會係想避免類似第67屆有人抗議唐英年拎榮譽博士嘅情況（註1）出現呢？對此，沈兄嘅解釋就係：由於「天氣及人多的關係」，所以今次就將個典禮移師室內（註2）。但奇怪嘅係，以前中大畢業禮大多同今次一樣辦於年尾，並且好多時都係一年只得一個畢業禮，所須頒發嘅學位多不勝數，難道以前就唔會出現天氣及人多等等嘅問題？到最後，校方為何要咁樣安排呢，仍然係個謎，要留待大家繼續關注往後嘅典禮安排，再慢慢參透啦。

但我地擔心嘅係，校方今次咁嘅安排，或會使以後再次舉辦畢業禮，會再分開搞，並且將頒俾榮譽博士果場安排喺室內。而萬一校方再次將榮譽博士頒俾具爭議性嘅人物，例如2009年有唐英年、2000年有李光耀（註3），而又辦於室內的話，咁樣難免會將反對聲音拒諸門外，阻礙學生係果個場合直接表達出佢地嘅心聲同訴求，咁樣會唔會令到校方誤以為，隨便頒榮譽博士都唔會有人黎抗議示威或者擾亂頒發程序，故此喺考慮頒俾邊個果陣就可以有少啲顧慮？

年份 屆 主禮嘉賓 頒授之學位 場地安排
2011 第70屆 曾蔭權（校監、行政長官） 博士及榮譽博士 邵逸夫堂
2011 第69屆 鄭海泉（校董會主席、銀行家） 學士及碩士 林蔭大道
2010 第68屆 鄭海泉 全部 邵逸夫堂
2009 第67屆 曾蔭權 全部 林蔭大道
2009 第66屆 鄭維健（校董會主席、商界領袖）榮譽博士 邵逸夫堂
2008 第65屆 鄭維健 全部 林蔭大道

註1：干擾畢業禮緣由及行動餘波

校園｜干擾畢業禮緣由及行動餘波

註2：沈祖堯指典禮移師室內非保護嘉賓
http://hk.news.yahoo.com/沈祖堯指典禮移師室內非保護嘉賓-043400179.html

註3：抗議中大頒授榮譽博士學位予李光耀聯署信

抗議中大頒授榮譽博士學位予李光耀聯署信

註4：第70屆大會典禮特別安排http://www.iso.cuhk.edu.hk/chinese/publications/newsletter/article.aspx?articleid=23707

註5：第69屆大會典禮特別安排ttp://www.iso.cuhk.edu.hk/chinese/publications/newsletter/article.aspx?articleid=17842