【生活】影札：高海拔之戀III

文：小武

高海拔之戀II
導演：杜琪峰
監製：杜琪峰、韋家輝

杜琪峰於上年的一個訪問中說過：「銀河映像不去發展一些商業電影，就沒機會去拍一些你鍾意的個人的電影，不拍賀歲片，就沒機會拍《PTU》、《文雀》、《放逐》。拍一些商業片，起碼投資人對你有信心和期待，自己想拍的電影，投入其實不高，《槍火》、《文雀》、《PTU》等影片投入資金就幾百萬，但賣埠在很多市場都很好，賺了很多錢——因為很便宜，反而還穩定」《高海拔之戀II》是銀河映像用來勇闖大陸吸金的第三炮（註），國內票房很差，但在港的票房卻一套比一套好。拍給大陸的，香港人反而越來越鍾意，這到底又是哪種因果關係？

銀河映像的皇牌創作人韋家輝擅於創造自己的電影符號，更擅於把電影符號套用到每一套電影之上。例如《天若有情》的劉華會出現在《孤男寡女》內，一分鐘便把另一個劉華由粉嶺送到尖沙咀郵輪碼頭。然後，《大隻佬》的了因或《嚦咕嚦咕新年財》的麻雀俠騎電單車時才會好笑。又例如《大隻佬》的張柏芝決心走入森林時那一刻的紅燈聲使我們知道，《黑社會》內，梁家輝與任達華在車內順利達成談判；《大隻佬》的孫果於森林迷失了「自我」，《神探》的劉青雲才會在森林找到林家棟的「自我」。《高》內也有個叫「樹海」的森林，當SAMMI井的老公在裡面失蹤了的同時，自己也忘記了自己要的是什麼。

話說多才多藝有財有勢的大明星邁克（古天樂 飾）求婚失敗，傷心之下敗走香格里拉，在秀（SAMMI井　飾）的賓館留宿。發現秀是香港人，在空氣稀薄的香格里拉開賓館，原來係因為等緊個唔見左嘅老公。大家同聲同氣，邁好快就領左秀野。秀又成日以為邁只係順便等到佢老公返黎，等下等下都領埋野了。跟住秀就梗係要好似《我左眼見到鬼》咁問自己究竟要做個義氣仔女等個老公返屋企呀？定係執左邁呢件超筍盤好呢？咁有財有勢的邁就日日響度多才多藝，秀又日日首生寡，加上佢原來係邁的頭號粉絲，結果當然就不用說啦。臨埋牙公安又話搵得返秀老公條屍，咁未又覺得都係義氣緊要啲囉。人地等左老公咁多年，而家終於都知道佢老公死鬼左，賣左間賓館去散下心，好易理解咋嘛。邁又唔知點解咁心急，由香格里拉返地球，用他們的故事拍了套叫《高海拔之戀》的戲同阿秀結案陳詞，順手當送隻「再生號」俾佢同自己囉。阿秀睇完就好冧啦梗係！覺得「再生號」載自己返地球之餘，仲載埋去邁克果度，大團完結局囉。

除了男主角與女主角之外，所有演員都是國內的，他們只會在彼此對話時用廣東話（古天樂的普通話部份是配的，可惜！）。即使是進軍大陸，設定在這個宇宙只有你和我的空間上，有些話，還是只想香港人才聽得懂。

喂！啲人成日都話「香港電影已死」，都唔係話無唔開心，但係返大陸拍戲都真係好好執嘛。話票房唔好都多過香港一倍喎！就算有義氣，都好難再將香港市場放在第一位。事實如此，亦都係唯有行落去，寄望國內市場係個有財有勢的好歸宿囉。人地唔投資自己，就真係會走去拍幾套《建X偉業》黎消滅你的。你真係覺得有得你ISOLATE佢咩？大勢所趨，當你意會到你要杯葛大陸貨時會渴死，你就知道你再掛住之前果個（或果啲唔知咩）都好，你都唔想死住的。再唔想拍的還是要拍，為了拍想拍的；再唔想睇的還是要睇，為了要看想看的。只是杜韋今次的「再生號」沒有載他們到要去的地方。作為香港觀眾的我，卻被載到那個中港關係的懸崖之上，看著他們是如此這般地往中國市場走下去了，越看越歡喜。

在這麼俗套的一個情人節，在這個排外氣氛濃厚的香港，看著他們用招牌類型電影闖關失敗，份外腰心。

註：
《蝴蝶飛》香港收百二萬，大陸收六千萬人仔
《單身男女》香港收五百萬，大陸收過億
《高海拔之戀II》香港收八百萬，大陸收千六萬（截至上月月中）