校園｜百佳真唔抵去

文：奧奇特

響超市買野唔係日日都咁抵，大家都知，減價都係暫時性。以中大嗰間百佳做例子，不時放任某幾種貨品，例如杯麵、餃子，去減價刺激購買欲望，不過減得一陣又賣番原價。經一連五日調查之後，總結到中大百佳好多時喺星期五就會回復正價。

買野俾錢，天公地道，件野值幾錢就要俾幾錢，俾少一分錢都唔啱。但係超市做緊特價個時，人人都可以俾少幾蚊，個情況好似做生意唔駛本咁，話減幾多就幾多。平時嘅特別價係點黎呢？查實，個差額都係要有人埋單。因為人唔作出犠牲，就唔會得到任何收獲，要得到某樣野，必須要付出對等嘅代價，呢個係消費嘅基本原則，喺超級市場買野都唔能夠違反。

牽涉到百佳做零售分銷嘅每個環節嘅人，都有份夾錢幫我哋俾錢買我哋要嘅野！由百佳入貨既時候，喺眾多供應商入面壓價到最平（平到生產貨品嘅人幾乎無法維持生計），奈何物價從未跌過，來貨價都轉到我哋身上好了，所以喺百佳買野唔係最理想。

拎去貨架俾人買之前，要先交過水濕腳上架費，幾萬到幾廿萬不等。供應公司唔肯俾，我地就冇得買個間公司嘅野。就算交足貢銀，百佳都未必準時俾番貨錢，拖幾個月先至算，供應商只好自求多福。

到擺上架，執貨員都有幫手做低個價，靜雞雞改晒全部價錢牌（NO！為左份工，為左老闆賺錢，為左大家買平貨，焗住少收人工啦）。做散工收銀員嘅，零七年最高峰嘅時薪有三十三蚊，近年越減越低，得番廿幾蚊一個鐘。職責繁重，開工企到收工，向每個顧客都要問有冇易賞錢，有冇自備購物袋，仲要收現金八達通易辦事信用卡。即使係咁，收入僅夠餬口。

有人分擔左件野嘅錢，本來應該好爽，但藉住處處為我哋方便嘅員工犠牲咁多，又緊迫重重生產者嘅生活，我哋至可以付出咁少得到咁多。去百佳買野，不但價錢都會貴，又會令一批人生活艱難，可以的話，少去一趟百佳，去下第二度。