社會︳【無良企業麥當奴】咪鬼食麥記啦不如

編、資料搜集：翼

睇左麥記咁多衰野，會唔會有d憤慨，想罷食咁呢？無？拿拿拿，「佢衰佢既事」既諗法其實真係唔要得架下，作為消費者，係無可能避得開俾錢養隻大鱷既責任的。唔知由自可，知道左，買野既時候，就真係要三思喇。

講話唔食麥記可以食咩咯喎，其實就真係大把，香港話大唔大，但講到食就真係大到癲，你只要行出商場四圍闖下，好容易就會搵到好野。為左顯示俾大家睇，被連鎖快餐店入侵既香港仲未被攻陷，我地今次響萬千個選擇裡面搵左九間茶餐廳，懶係遍佈香港九龍新界，又梗有野好過食老麥咁，希望大家行入老麥前會諗得起，你為左棵樹，放棄左個森林，繼而過主咁樣樣。

拿，你放唔低junk food咩，唔緊要，有好食夾抵既小型漢堡包店；唔特別好d熱氣野，淨係貪麥記可以歎冷氣hea下既話，仲易，有唔太逼又好景，對住親切阿姐爽過對住麥當勞叔叔一萬倍既舊式茶餐廳；凌晨四點想咪鬼食麥記啦不如食野唔去廿四小時營業既老麥唔知食乜好？有開通頂既港式茶餐廳俾你揀。

當然啦，搵得果九間，佢地當然未必係最好，閣下鍾意既，可以再搵下，肯定仲有一噸好野等緊你。

不過話時話，就算合埋眼當睇唔到麥記做左幾多衰野，我都諗唔明其實麥記有咩好。黎黎去去得果幾隻包，D包又越黎越細隻，D餐又越黎越貴喎，仲要逼人飲汽水，唔鍾意飲就惟有加錢轉，算，豪俾佢，但係轉咩好呢？咖啡又難飲到癲，雀巢又一舊毛……

好就好在你響果度hea幾耐都無人趕你走，你知啦，響香港無乜得邊度可以俾你hea gumma如果你唔想駛咁多錢。咁查實，去麥記歎冷氣唔俾錢佢搵都ok架喎。

追捧漢堡包系列

時新快餐店
地址 : 紅磡黃埔街1A地下
電話 : 2362 1279

包款多，又足料又新鮮，你睇下個雙層芝士蛋漢堡，厚成咁成個餐都係廿蚊倒乍陰公！

金牛快餐廳
地址 : 灣仔軒尼詩道 155 號地下
電話 : 2519 0198

D包個樣無隔籬時新果D咁靚仔，但都相當新鮮呢 ！

其他好包

澳門翠苑茶餐廳
地址 : 旺角上海街557號旺角熟食中心2樓8號舖
電話 : 3514 4348

旺角熟食中心其實仲有好多又平又好食既餐廳，揀呢間係因為佢有個招牌咖哩牛柳農夫包，聞說個包外脆內軟香到暈，跟餐個湯仲好鬼足料添！

茶餐之最

維記咖啡粉麵
地址 :深水?福榮街62號及66號地下北河街165-167號地下D號
電話 : 2387 6515

有唔係周圍都食到既咖央西多！

金華冰廳
地址 : 太子弼街47號地下
電話 : 2392 683

侍應靚仔得黎又夠佬囉，動作又快但又粗粗地，D OL答晒糖而且因為太好生意，D 食物想唔新鮮都幾難呢。

嘉樂冰廳
地址 :荃灣新村街40B號地下
電話 : 2493 7308

sorry，你眼前呢舊係叫「火腿小奄列」，小到D火腿爆晒出黎，大既仲得了？

懷舊茶餐廳系列

美都餐室
地址 :油麻地廟街63號地下
電話 : 2384 6402

懷舊茶餐廳，響電影中心無遠，友人說「有得坐樓上的茶廳餐超美好呢，而美都的蓮子冰又超好吃呢」。

星座冰室
地址 : 尖沙咀金巴利道16-20號香檳大廈地庫36號舖
電話 : 2724 4408

老尖都有平靚正麵吃，間舖又有特式，真難得！通頂趕工既小記望住碗蕃茄牛肉面果時D口水滴晒落個keyboard度呢…

通頂好選擇

華立茶餐廳
地址 : 大埔寶鄉街48號地下
電話 : 2656 8788

夜晚響無啖好食既中大趕披爬見肚餓雪櫃又空既時候的好選擇。