我的志願是做 （黑社會）大佬 —— 訪兼職講師

訪、文：Me6uo

「高等教育界同黑社會呢，係好接近嘅個結構。黑社會個結構就係，你會見到好多人願意冒 一啲好唔合理嘅風險 ，做一啲好高風險 但得好少回報嘅工作。好似賣白粉，你一比人捉到就坐幾碌、十碌，但佢賺好少錢。點解咁多人做呢？係因為個結構好 flat ，上面得好少人，下面好闊、好多人做細。好多手下喺度做打手、賣白粉、黃賭毒，但上到做大佬嘅得好少好少。點解咁多人係下面做？因為佢哋成日見到啲成功例子，唔會睇到失敗例子。你見到啲大佬好風光咁出出入入，當然你都會好想自己係咁，你就會好努力付出好多，直至廿年後你只能 stuck 喺個啲（做細嘅）位度唔知想點。」

「有一個好好嘅解釋就係高等教育界其實差唔多：你讀書嗰陣見到啲教授r ，你就會想象 自己做到，覺得幾好呀， 社會地位 又高，人工又好，跟住又相對自由，又唔洗返辦公室，嘩好正呀咁樣。但係個啲係黑社會大佬。下面一大堆嘍囉就會仰望住嗰啲人，嗰啲（位置）其實你又未必可以做到。你喺下面就係喺度幫佢賣白粉，然後若干年過去你會發現自己行唔到落去，跟住讀咗 PHD 你已經三十幾四十歲，你跳唔到出嚟，你亦都唔會想跳返出嚟，仲要睇有冇人肯請你。」

學生報有幸邀請到任教人文學科的 P 講師（化名）略談兼職講師面對的挑戰，以上便是其對兼職講師，甚或是整個高等教育界的看法了。兼職講師和其他兼職工作要面對的挑戰無異，是一份福利少且不穩定的工作。一如《大學裡的一粒小小螺絲——訪兼職講師》[1] 中所提及，這工作「仍是人工偏低，沒有固定合約」，而要成為一個兼職講師，起碼也要有一個碩士學位。那麼問題就來了，門檻如此高卻又不穩定的工作，為何還有那麼多人前赴後繼地想要入行，難道真的是為了要做「黑社會大佬」嗎？兼職講師所得的人工和付出是成正比，還是受盡剝削？因為中大兼職講師並沒有一個劃一的制度——請人、合約內容以及解僱準則都是由各部門自己決定的，不同兼職講師的待遇可能並不一樣。所以，下文會由 P 講師的角度出發，並綜合《大學裡的一粒小小螺絲——訪兼職講師》中任教人文學科的陳講師（化名）的訪問，以更清晰地瞭解中大兼職講師所面臨的挑戰。

僧多粥少下的妥協

問：「有咩原因驅使你做兼職講師？ 」

P :「我依家仲讀緊 PHD ，如果要搵份全職嘅工就冇可能，為咗錢，咁咪去做兼職講師。事實上係好多學科，如果你要讀到上去博士，你讀之前就已經知道係死路一條。死路嘅意思就係一定要從事同學院相關嘅工作。最理想嘅 case 係，如果你鍾意又做到研究，喺中大就係做教授 。但事實上嗰啲位好難爭——全球招聘下，（教授）每年喺外國都已經係供過於求。如果你想讀 PHD ，又想留喺學院，可能兼職講師就係最常見嘅選擇。同一時間我都覺得份工係幾有意義，我真心享受同學生嘅互動。以前面授嗰陣我會嘗試記啲學生名，落堂嗰陣同佢哋去食 tea 、飲咖啡。」

陳 ：「我做兼職講師係希望可以學以致用，而且全職講師實在太少位，我冇 PHD ，符合唔到做全職講師嘅要求。再加上我又冇其他工作經驗，要轉第二行又要有返差唔多嘅人工都唔係咁容易。越讀上去你會發現個社會根本冇咁多空間比研究學術嘅人，你讀得越專門，反而出路就越少。每年咁多 PHD 畢業，只有最好彩嘅先會攞到全職講師個位，講緊嘅係萬中無一，其他一係炒散一係轉行。如果你後生啲嘅咪試下多線發展，比如好似我咁接下啲翻譯嘅工，都叫自己養得到自己，所以即使份工唔係咁穩定都可以捱到落去，但有時我都會覺得咁樣工作完全係為咗生存。」

失敗的行政

問：「既然你唔係全職講師，自然有好多嘢部門都唔會畀資源你，不如分享下平時行政上你會遇到啲咩問題？」

P ：「比如我哋通常都唔會有 TA （教學助理）。雖然每個部門嘅決定都唔同，佢請你嗰陣會決定埋，如果有嘅話都唔出奇，但通常都唔會有。請得你（兼職講師）就係想我（部門）畀個 course 你，你幫我搞掂佢，我唔理跟住點㗎喇，你唔好搞啲額外嘢畀我做就得。但有時應該都係睇個 course structure ，好似依家 zoom 咁，一堂可以有 120 人，噉佢就會畀個 TA 你。但佢淨係可以做一樣嘢——改功課同埋改 mid term 。（對比起面授）工作量係大咗，但叫有個人可以幫下你。但有時派畀你個 TA 讀嘅野又唔係你個 field ，例如讀歷史嘅研究生可以做任何一個大通科目嘅 TA，如果佢唔嚟sit堂，有機會你要將啲野再教一次，佢先幫你改到份卷（因為在其任教的人文學科中考試卷中的答案是沒有既定答案）。

同埋依家我係入唔到中大，我張（職員）卡係廢咗。因為我係跟 course 簽約，所以佢 7 月幾就會停咗我（張職員卡）。我下個星期開學，但佢係會整唔切個 staff account 。當 9 月 1 號開學，開學嗰日我個 staff account 先生效，而個 staff account 生效咗之後，先可以申請圖書證同埋入到 Blackboard。但 9 月 1 號就上堂㗎喇喎，所以我係畀唔到連結或宣佈定啲嘢 。」

陳：「所有嘢都係一腳踢，好多 logistics，比如要 scan 資料上載到 Blackboard、解答選科查詢、計出席、收功課、影印資料呢堆。同埋上 tutorial 要視乎有冇 tutor，如果冇派畀你嘅話就要身兼兩職。大部分 3 cred. course 要超過 40 個學生先會有 tutor，有啲course，好似大通（大學通識）就唔會有，所以有時個感覺就好似佢外判畀你，你就要搞掂所有嘢。

除咗冇 TA 同 office ，我哋都唔會有 locker ，就連去 UHS （保健處）睇醫生都冇我哋份。喺合約同合約之間，我係完全用唔到校內設施，理論上我連學校都唔可以入。我之前試過成功爭取過一張短期嘅 guest library card，雖然終於可以入圖書館，但因為我冇 office ， 在家工作 嗰陣我係用唔到個 e-library ，所以睇唔到 online journal 或者 e-book 。噉嘅教學模式其實好冇營養，亦都完全發展唔到自己，所以我愈教得耐愈強烈感受到，我只是一粒螺絲。」

黑箱合約

問：「大學係點請兼職講師同埋你哋啲人工係點計架？」

（22min ~28000 2 cred course, ~40000 3 cred course）

P ：「請人嘅話好睇部門，通常要你試教個 course 嘅某個 topic，試教 15 分鐘。但有時急住要人，就試堂都唔洗，直接請。因為好多時候大專學界係人搭人搵， in a sense 好黑暗下。佢信你搵個人係 OK ，直程冇（ interview 同試教）就嚟料（簽約）㗎喇。就好似當初，我都係喺Facebook PM 學系入面認識嘅系主任搵到呢份工。佢有時都會開啲正式嘅招聘廣告，但識人係重要。

至於人工方面每個部門都唔同，好似我之前喺唔同部門教過，每個鐘大約差 50 蚊咗右。雖然佢唔會公開個計法，但我估同你學歷掛鉤，如果你係 PHD 就應該會更高，如果唔係就應該同我差唔多。」

陳 ：「中大已經算係比較好，合約人工係計 20 個禮拜，有啲學校淨係計 13-14 個禮拜，姐係出畀你教嘅 course 多一個禮拜嘅人工，作為你平時課堂外備課嘅報酬。但學系從來都唔會公開人工嘅計法，亦都冇薪級表或者其他指標做參考，所以我唔知其他講師嘅待遇，都唔知自己嘅人工係咪合理。同埋我嘅人工唔包括喺我學系嘅經常營運開支入面，令我成日要等財務處批先出到糧，所以每個月出糧個日子都唔同，之前仲有試過拖糧。」

問：「你地幾時先會知到續唔續到約？」

P ：「唔知架，對我哋嚟講，最核心個問題係今年喺呢度教，下年有冇得教？唔知。每年都唔知，有時要乞啲工返嚟。如果你個 field 冇咁多位俾你教嘅話，就會冇咩保障。仲有你每年要教咩都未必知，好取決於人地畀咩你，明知係豬頭骨都要啃。同埋如果突然呢度冇工返，我要搵第二間院校，咁可能我要到 8 月尾先知自己要教咩。如果你冇工做或者唔夠錢洗，就要即刻諗辦法教到。」

陳 ：「冇人知幾時續約。我試過喺 8 月尾比人請，亦都試過 6 月就有 offer ，但無論點都好，冇人保證到我會一直有工返。通常 sem 尾嗰陣部門會有秘書打電話問我想唔想繼續教，之後部門會再開會決定，所以都唔輪到我話事。我之前試過問 course coordinator 可唔可以延長合約或者加啲保障我哋嘅條款，但就俾佢用『牽涉資源撥款要由更高層決定』呢個理由推搪。同埋續唔續到約同教學表現都未必有關，因為我之前都見過有啲教咗好耐同教得好好嘅講師，突然俾部門通知唔會續約。如果佢決定唔同你續約嘅話，佢係唔洗同你解釋，可以係佢突然決定唔開班，又或者想開少啲，我感覺自己嘅角色好似只係要嚟塞住時間表個窿。」

沒有工會的孤兒

問：「近年出現咗咁多新興工會，你地有冇參加過啲咩工會？」

P ：「我估我應該可以加入中大員工總會嘅，但佢哋啲福利政策都應該係偏向全職員工，同兼職講師冇咩關係，同埋喺香港工會能力唔大，冇咩可以做到。要成立個兼職講師工會又唔實際，大家份約都唔穩定，個工會搵邊個負責？唯一方法應該係睇下中大員工總會可以點樣好啲咁涵蓋兼職講師，但目前為止我自己就對參加工會冇咩興趣。」

陳：「我對坊間新成立嘅工會幾有興趣，但我連佢哋嘅主張或爭取咩目標都搵唔到，叫我點加入先？我覺得工會係用嚟爭取勞動條件，而唔係以單憑政治表態嚟組織工人。如果個工會存在嘅目的單單係為咗反政府，咁就永遠都團結唔到政治光譜唔同嘅工人，亦都冇可能用工人階級路線去令非政治化嘅人覺醒。你睇下呢十幾年嚟泛民個口號一直都係『先有民主，後有民生』，根本就冇建立或者提出到任何堅實嘅經濟性綱領，所以建制派咪可以用經濟利益同蛇齋餅粽嚟吸納剩低嘅人，佢哋亦就係我哋口中嘅『藍絲』。

結語

在大學幾年中你會遇到形形式式的老師，可能終究你不會和他們有課堂外的接觸，但總會有一兩個的教學風格令你欣賞甚或啟發了你，他們的身份有可能是兼職講師，並受到大學教育市場化的剝削，歸根究底他們也只不過是大學教育兼職化及零散化下的產物。聘請他們是為了節省學校金錢（詳見〈操縱從未間斷——UGC 的罪狀〉），以「重研輕教」的方式來獲取「競爭力」及「國際排名」。要改變這番景象並非團結全世界的兼職講師們就能成功的，畢竟世上的高等教育市場早已面臨飽和，供過於求。在不少高知識份子為了一份兼職教席做願意「做爛市」的情況下，身為學生的我們可以做的可能不多，但不妨在 sem 尾的 Course-E (course evaluation) 踴躍表達意見，雖然不能改變制度，但也可能成為兼職講師被續約的一小個因素。

[1] 50屆學生報「深瞳」， 2020年迎新特刊，《大學裡的一粒小小螺絲——訪兼職講師》