我係鍾意周圍瞓呀，吹咩？

文：露宿生

唉，宿舍又冇我份住，番屋企又山長水遠，啲車錢仲好肉赤添。咁咪唯有訓中大囉，善用果啲公共空間嘛，橫掂中大山明水秀，周圍都係訓覺好地方。
訓覺嘅地方大致上可以分兩種，一種係疑似宿舍配套嘅地方，另一種就係扎營嘅好地方。

A. 宿舍替代品
1. 碧秋樓
話說碧秋306電腦房24小時全天侯開放，好多人都會將啲電腦櫈拍埋一齊就晌呢度長眠架喇，冷氣又開足，電腦又快又任用唔嬲，仲唔係訓覺同做野嘅好地方？仲有呀你咪以為只有宿舍先可以建立到個人際關係網絡出黎，呢到啲人見慣見熟，已經稱兄道弟，感情深厚到爆架喇。

2. 范克廉樓地下學生活動中心，又稱玻璃房（范克廉樓LG）
由今個學年起，中大學生會已經成功爭取24小時開放，入面有梳化幾十張，冷氣又長開。聽聞某附近學會啲人開會開到夜一夜都會走入去訓個靚覺。筆者都試過晌到訓晏覺，藍色果張梳化超舒服，你都咪話唔爽。想沖涼嘅話，上三樓就有間浴室架喇，想飲水三樓果到仲有個pantry添。

3. 范克廉樓三樓學生活動中心，又稱范記306（范克廉樓3/F）
以前有幾張雙／三人梳化，都會見到有啲同學無宿住就會入去訓。但係可能OSA覺得不雅啦，裝修完之後換晒做啲單人梳化，仲要開宗明義話就係因為唔想比你訓。但係都見到有同學將兩張單人梳化拍埋就訓，亦有同學直接訓枱面。講真，呢度叫得學生活動中心，你理得我訓唔訓覺啫，你又係咪比個宿位我先？呢到最好嘅地方係有浴室同pantry，真係長期住晌度都得呀。（枕頭同被可以過報社借，如果有多的話。記得還呀！）你可能會話冇位擺嘢好似有啲麻煩，可以考慮侵佔LADY SHAW樓梯口果邊冇人用嘅locker，善用資源嘛。

B. 扎營好去處
1. 百萬大道
唉，百萬大道整到咁grand，除左畢業禮間唔中會晌呢度搞下之外，都好似冇乜用咁。咁就不如扎營啦！一黎善用個空間，二黎果度都幾好訓，夜晚涼爽，又冇乜蚊，仲有呀，冇乜雲果陣抬頭望到一堆星星，好開心架！想像到如果有十幾個營排排扎扎晒晌百萬大道果種感覺都幾爽，各大學會搞OCAMP不妨考慮下咁做，搞起個扎營文化都好。最衰中大唔比扎營（就係咁先刺激？），之不過咁，啲食蕉通常過左一點之後就唔會再巡，見到都只係勸喻一下，咁囉。

2. 獅子亭
清涼，舒服，唔會有食蕉巡，有瓦遮頭，唔嫌啲石櫈硬的話唔駛扎營都得。風景極優美，一眼望過去就係大大個未圓湖，而且果度相對黎講都幾隱蔽，半夜三更通常都唔會有人經過果到，而且又好難會比人望到，做乜都得啦。

3. 天台of MMW、Ulib
MMW天台一定冇人巡喇，講舒服都幾舒服嘅，涼爽囉，有啲長櫈晌度比人訓，基本上冇乜事都唔會有人經過，只不過咁，果度好似有啲荒涼，咁囉。
有人試過匿埋晌Ulib某啲陰暗嘅角落，等到食蕉一走就上左Ulib天台訓，話冇宿住，邊到都要訓架啦！

中大是我們的，也是你們的，但歸根究底也是我們的。所以，老友，盡情咁訓吧！！！！