文：煙骷髏

同學仔，初來甫到，記住要認得d眉頭眼額，搞清楚邊個話事呀！

大粒佬

校董會

大學最高決策機構，神龍見首不見尾。

冇學生代表既校董會，全港幾乎只此一家。有d大學高層，有d議員，有d老校友，有d書院代表咁囉。冇人知佢地到底幾時開會，開會傾d乜野，又或者通過左d咩政策。校董會既消息，只會係press con出現。

行政與計劃委員會

又名AAPC，正副校長，書院同學院院長加埋三四個其他高層行政人員。

有名你睇，所有行政野都係呢個會話事。幾時開會，唔知；傾乜，唔知；過左咩野，唔知。

而其實，校董會都係聽佢地講。

教務會

所有教研事務都係教務會話事。

到目前為此，係一個百九幾人既橡皮圖章：除左正副校長、書院同學院院長，仲有系主任、書院既院務委員，同埋所有教授。唯一有學生既高層決策機構，學生成員包括五個學生會會長，另外每個學院都可以選一個學生入去。只不過，一個人要lobby成個學院既同學，先可以當選，一年都不過係開三次會－－有兩個學院有人做其實已經算好好。

而家講緊要精簡架構，按比例縮減人數，不過所有高層都會留返低喎。

小惡霸

校園發展處

起樓拆樓，拆樓起樓，大裝修，起斜坡，斬樹填河，之類。

幾時搞到你間宿舍？會唔會拆左你department？對唔住，你冇權過問。

秘書處

理論上所有大學行政文書工作都關佢事。

寄信俾佢十世都唔覆，公開答應學生做既事一年都做唔完。

咁多pending既工作，可見大學秘書長百萬年薪真係唔易賺。

保健處

出左名，醫你唔好，醫你唔死。

以香港既醫療質素計，醫療事故都未算特別多，不過搞到同學終身殘廢既事都唔係未聽過。

唔想上PE堂，咪即管去下囉。

學生會

以為選左佢地出黎就關你屁事？好多人都當學生會係頹莊咁上架。

有一年中大學生會超支七十萬，又有一年聯合學生會俾幹事虧空左幾千蚊；學生會撐民主反中共撐基層反精英既立場，你又係咪同意？

雖然上面有個代表會管下佢地，之不過，代表會幾個月都call唔到一次會架。

校園惡霸數之不盡，餘不一一。

想出聲？

三不五時，大學都會宣佈成立D諮詢委員會，夾夾埋埋都有廿九幾個：學生交通、飯堂、性騷擾政策、環保、通識教育，之類。

雖然委員會既成員有冇心聲人意見其實都係撞手神，但事在人為，唔試過又點知唔得呢。

一般係二、三月左右招募學生代表，咪即管留意下囉。