實習兩難

文：路邊社
好實習（internship）疲於奔命，寫份靚靚CV(1)廣發到各大公司當然唔少得，如果幸運得到其中一兩間回覆，先是要去做個aptitude test(2)、加個筆試、再失驚無神送你一個phone interview，有幸去third-in(3)的話，就更要好好準備，以擊倒同場的對手，獲得心儀的實習機會。活脫脫就是一幕幕真人版的《血拚》。為intern勞心勞力，最後不過兩個目的：學野和搵份好工。究竟哪些intern 學到野？哪些又會對你的仕途有幫助？

選擇一：在大公司混噩度日

有人可能會覺得大公司的人力資源管理會比較好，理論上會充實D卦。不過路邊社聽過好多喺大公司做intern嘅都係混噩度日，影印、入data、跟人周圍走下，咁又一個月啦!有人試過喺AIA返一個月工，剩係認認真真做過一個鐘野。路邊社個中學同學喺香港intern大戶HSBC做過一排，咪又係日日睇資料！

雖然大公司好似無咩野比到你做，但大家對佢趨之若鶩又唔係無原因嘅。話曬寫CV嘅時候，可以寫自己喺大公司做過（即使只係intern），都稱高一線啦！橫掂大家又唔會知你實際做過D咩，只要你觀察多D個部門做咩，不論寫喺CV入面嘅job description，定interview比人問起，都答得有板有眼啦！

選擇二：在細公司做廉價勞工

大公司無野你做，學唔到野，咁細公司又如何呢？路邊社嘅消息來源話比我知:「喺細公司做，原來可以好Q多野做。」雖則D人成日話，你入去間公司做intern，間公司仲要搵人教你野，唔好嫌三嫌四啦！不過其實佢教識你一次，你就可以不斷幫佢做架啦！所以神奇地，我消息來源做野嘅會計公司成功維持一個十分具效率的人力結構：全公司除老闆外，只有一個full-time，另外五個職員全部都係仲讀緊書嘅part-time同intern。學唔學到野？實學到。人工？唔計較得咁多架啦！

滿了一半的（屎）水

如果充滿正能量地去審視internship，日日睇資料的過程又未嘗不是一種學習；苦悶的上班日子就是讓你提早認識社會；人工低不過是因為你無經驗，人地教你野，唔問你收學費已經偷笑……阿Q(4)嘅說話，我地可以講很多，可是如果不是要為了我們的仕途、為了向未來老闆解釋我們暑假在做甚麼，難道我們找不到一個比日日睇資料更有效率的學習方法、找不到比了解工作環境更有意義的目標嗎？To be or not to be？真正的兩難不是入大公司定細公司，而是甘心喝下面前這半杯屎水，還是眼看著自己落後、自絕於高薪厚祿的職位。

(1)亦即resume，履歷表。對公司來說，就是你的人生成績表。
(2)能力傾向測驗。通過將你量化成數十種能力指標上的數字，以預測你日後的工作表現。
(3)第三次interview。斷估都係Final Round啦掛。
(4)同上文另一個Q字意思不同，阿Q為魯迅作品《阿Q正傳》裡的人物。