割離於生活的宿舍生活

文：游遊悠

或者係我俾電視青春劇呃得太多，多元繽紛嘅宿舍生活我真係冇經歷過。你實會話「車，係你嘅經歷先咁柒o者」，屌係咁架啦，從來想像中嘅宿舍生活有無限咁多種，我只係講緊我對過去宿舍生活嘅感受，係好個人架喇，但係我住過一年宿，都算總結到一啲人類學觀察嘅（=.=），我講完出黎，睇下你住宿之後會唔會有共鳴，咁囉。

如果你份人係好中意玩的話，宿生會搞嘅活動頭幾次或者可以令你興奮，之後就得番小貓三四隻黎參與，有啲悶。我都分唔清係我間宿啲人唔積極，定係活動設計得唔好玩，定係從來冇人特別想玩宿生會啲活動。其實洗乜一上莊就計劃哂全年會玩咩活動，我覺得宿舍裡面的玩應該係一堆人想做d無咩意思、不為什麼的群體活動（activity）；如果玩本身係有目的滲咗入面，例如交職典禮要有幾多法定人數黎參與先可以開始、要做到乜乜效果，咁就已經係一個 well-planned 嘅活動（action, instead of activity）。宿生會一年有廿幾個上莊搞過無限次嘅活動，太過形式化到最後只係辛苦自己，或者自high（？！）。所以宿生會嘅活動有一部份唔應該係預先計劃，最好係即時同宿生／走讀／任何人jam出黎，求尻其玩枕頭大戰都得啦。

為咗建立所謂嘅歸屬感，我地會有好多想法塞俾自己／被塞，「宿舍係你第二個屋企，唔係剩係訓覺同擺嘢，同酒店係唔同架」。但無論講到幾理想都好，現實的宿舍生活就係千篇一律嘅活動，其餘時間你咪靠自己搵嘢做下囉，好彩嘅會遇到朋友一齊去canteen食飯／自己煮，搵人陪你一齊打機都唔成問題，但其實呢d活動本來自己做都得，多個人都只係令到呢d嘢冇咁悶。我亦試過成個sem每晚都打開房門，等其他同層／路過嘅宿生可以隨便搵我傾計，問題係其他人都封閉住自己，根本無機會溝通、認識，有時我主動Hi佢哋，得到嘅回應係微笑然後逐步走開。唯一聚到最多人、最多元多變嘅就係小賣部，唔係因為佢賣啲嘢食有幾正，而係因為佢喺大門隔離，係所有人必經之地方，可以怒昅女／仔、傾計、亂叫、大笑。

而且呢個家會有「宵禁」，過左十二點之後宿規、舍監、保安員、樓導師就係至高無上的Law and Order。做錯事，喺屋企都有得駁咀，喺宿舍你就只有俾人記名、執行冰冷嘅宿規程序，無咩討論嘅餘地，你唯一可以依賴嘅就係執法者嘅酌情權、你同佢之間嘅人際關係。而對於「錯事」嘅定義，宿生都只能接受，從不質問，或者會照做「錯事」，搏唔會俾人捉到，彷如回到中學生一樣表面上安守本份，但絕大部份人都唔會直接衝出黎say no／屌你老母。

冇say no／屌你老母就冇火花，冇火花就會好單調、好悶。如果人嘅差異係要靠他者互為定位、定義嘅話，宿舍裡面千篇一律嘅生活註定你會搵唔到呢份差異，因為宿舍裡面嘅他者竟然係千人一面，置身其中嘅我實在唔能夠為自己定位，亦搵唔到自我。宿舍生活成為routine，慢慢你會唔識／唔想同主流相處，你亦寧願同孤獨相處，你向外追求，發覺不合主流、孤獨嘅人唔剩係你一個，因此就算你夠宿分都好，你選擇下年離開宿舍，過另一種生活。

寫宿舍生活，無可避免要得罪好多住宿嘅朋友，sorry，或者我唔係呢種人、o個種人，我唔入流、唔特別投入宿舍生活，講到尾，其實我都係想搵番自己、做番自己o者，我想要嘅係生活。而你嘅「自己」又可以同我嘅好唔同架嘛，係咪？