係走讀生又點呀？吹咩？

文：edward

好多人對走讀生的印象都是又頹又摺，邊比得上宿生多姿多采嘅生活呀。車，咁又點呀，住宿好巴閉咩？講到尾你地只不過摺係中大入面啫，我地走讀生生活分分鐘比你地更加精彩。

平都平過你一截啦

先由經濟角度入手。兩個sem雙人宿舍宿費大約是八、九千蚊左右，而兩個sem大約係八個月左右，每個月大約千幾蚊。筆者住喺港島，來回車錢大約15蚊，假設日日返中大，一個月交通費大約450蚊，比宿費平一大截。另外，宿生常日要喺學校食飯、洗衫，而走讀生可以喺屋企洗衫、食飯，點計走讀生啲生活費都比宿生平啦。

嘥時間？你話呀？

有人話︰「你地班走讀生成日都要嘥好鬼多時間搭車，咁我都係用錢買返d時間返來啫。」做走讀生係要花好多時間搭車，但其實你可以用搭車時間做野嘛。我自己搭車時就會攞本書來睇，喺呢年走讀生活都睇左唔少書，大部份都係搭車時睇。其實嘥唔嘥時間係要睇下你點樣用d時間啫，唔通你覺得喺宿舍度hea唔嘥時間咩？

另外，宿生平日屈喺中大度只係見到中大d女仔，而中大啲女仔通常都唔化妝。邊到好似經常都要搭車嘅走讀生咁，常日可以見到港、九、新界唔同地方嘅靚女呀？搭地鐵有時都幾迫，地鐵常日chok下chok下，咁同d靚女少不免會有d碰撞，肌膚之親就在所難免，你明我講乜啦。

你以為我地摺呀？你地咪重摺？

要出中大食個飯真係幾麻煩，去大埔、沙田食個飯一來一回都要成個幾鐘，所以有宿嘅人怕麻煩留喺中大而唔願意出去。哈，常日笑我地摺lib，你地自己咪又係摺喺比較大少少既中大之嘛。我地走讀生就唔洗留係中大食飯，可以選返屋企食，同家人共聚天倫之樂，又唔介意出街食，中日泰韓多多選擇，邊似得班宿生成日都要食頹飯。

走來走去搞搞震

我地走讀生係一隻無腳雀仔，係中大走來走去就係我地嘅特性。中大入面有好多資源，只係睇你去唔去發掘。而走讀生因為無宿住，一來唔使比間宿舍綁實可以四圍走，二來能夠有更多時間係中大度發掘一啲好玩嘅野。

中大經常會有好多唔同類型學會活動或講座，而當中唔少係有飲食供應。我地可以走去扮參加d活動，但實際上去呃飲呃食，食完就鬆。一來可以填飽肚，二來有時去玩下人都feel都唔錯呀。大家記得留意每星期五下午發出的mass-mail，佢會提供有好多有用嘅情報。

唔知大家有無去過係本部Lady Shaw呢？嗰度嘅樓梯口有一大排locker，其中有好多係無人用。我有朋友見到locker無人使用，就帶兩個鎖佔領左兩個空locker，而且無人發覺到。哈，幾好喎，等我下次都試下先，咁就可以解決左無地方放雜物的問題。

其實中大重有好多好多野玩，你花d心思落去就會發現到。各位新生，你地千祈唔好比d宿舍生活好精精彩嘅假像呃到，快d加入我地走讀生行列啦！