大粒佬與地頭蛇

同學仔， 初來甫到， 循例都要介紹佢地俾你識。

大學校董會
大學最高決策機構， 神龍見首不見尾。內裡有啲大學高層、有啲議員、有啲老校友， 有啲書院代表咁囉。無學生代表的校董會， 全港幾乎只此一家。江湖傳聞， 沈祖堯校長打算加中大學生會會長入局， 成為當然會員， 不過仲未落實架。無同學知佢地到底幾時開會， 開會傾啲乜野， 又或者通過左啲咩政策。校董會嘅消息， 只會間中喺大眾媒體度出現。

行政及規劃委員會
佢係校董會屬下的委員會， 又名A A P C ， 裡頭有正副校長， 書院、學院院長加埋三四個高層行政人員。有名你睇， 所有行政野都係呢個會話事。幾時開會， 唔知； 傾乜， 唔知； 過左咩野，唔知。而其實， 校董會都係聽佢地點。例如上年六月中大新民主女神像事件就係佢哋搞事。

教務會
名義上校內所有教研事務都係佢話事。不過一年開得三次會，實際上只係兩百幾人嘅橡皮圖章：裡面除左有正副校長、書院同學院院長，仲有系主任、書院嘅院務委員，同埋所有教授。呢個會係唯一有學生嘅高層決策機構，學生成員包括中大加四書院學生會會長，另外每個學院都可以選一個學生入去。

而家講緊要精簡架構， 按比例縮減人數至五十人， 不過所有高層都有得留低。

校友評議會
所有畢業生都係校友（ 重駛講？ ） ， 有權喺校友評議會名冊列名。即係話你三／ 四／ 五年後就夠秤入會， 入到去仲有機會被選入校董會做中大渣f i t人添。校友評議會協助中大加強公共關係，職責係建立良好社會形象， 又會就校政俾下意見。七月中晌李兆基樓舉行咗年度大會，會議期間，主席為求快脆搞掂，亂咁數票，限時討論，好多嘢未傾掂就落決定，完全唔理觀眾席上群情洶湧。當日仲有大選，改朝換代。周澄都出黎選主席添，不過最後落敗俾建制派嘅人馬。新一屆裡頭啲人都係親建制，開明派如陸耀文無得連任。睇黎呢個會黎緊都難繼續扮演監察上述幾個大粒佬嘅地頭蛇角色。