校園散打

再下一城，「逸夫」成功呃「蝦條」
文：東郭先生

「實驗室專門大樓冠以邵逸夫博士嘉名，以銘謝邵博士歷年來給予中大的鼎力支持和寶貴指導」，是咁的，七月頭我睇報紙先知道，邵逸夫捐咗約值一億港元嘅TVB股票俾中大，同時「Periodic Table」（又名「七彩蝦條」）已經改名叫做「逸夫科學大樓」。

改名對大部分人黎講可能唔係咩大事，但對我黎講都幾係一種鬱結，因為成日會聽到啲人將校園比作家園，總之就係懶溫馨嘅說話啦。但一如既往，我地做學生嘅就只能夠由校外媒體度知道「屋企」發生咩事，點解無同我地事先商量過吖？命名典禮同埋工程都係完成哂先通知我地，就好似你忽然有日喺報紙見到自己阿媽改嫁咗，都會好無奈啦！

不過呢，我依然覺得叫番「Periodic Table」或者「七彩蝦條」係好聽啲，甚至我地可以集體地完全無視呢啲校方、商家訂立出黎嘅大樓名稱，為每幢大樓都改個花名，然後教freshman講番我地建立嘅共同語言，至少喺姿態上質疑啲有錢佬點解俾咗公價一億就可以為大樓命名。Keep住叫「Periodic Table」或者「七彩蝦條」除咗係為咗守住我哋恥笑大樓外表嘅集體回憶，亦可以方便區分清楚啲地方名，事關全中大有四個地方都係叫「逸夫」。除左上面嗰個，仲有逸夫書院、Lady Shaw Building、邵逸夫堂。用舊名嘅話，約人見面就唔會搞錯地方啦。

___________________________________________________________________________

校友評議會， 咁樣開會都得？
文：奇聞

校友評議會，睇個名，即係由校友去評議（校政）嘅會囉，咁佢既權力與職能都真係有列明呢點。你我畢業之後都叫校友，都會成為佢嘅會員，而且呢個會係法定組織，理論上係代表中大校友。佢平時會幫學校籌下錢搞下公關，學校點都會俾返幾分薄面佢。

話說校友評議會喺今年嘅7月9日舉行咗2011週年大會。幾乎年年嘅週年大會都得幾十丁友去，但自從上年爆出民女事件，加上校友對劉遵義管治積怨已深，故數名年輕校友打著「改革」旗號殺入常委選舉，以圖有機進軍校董會，監察校政、鞭策校方。今年周澄伙拍序言書室老闆李達寧再接再厲，競選主席與常委職位，主張捍衛大學價值，可惜最後敗給一直親校方的建制派。依家個常委會全由親校方的建制派坐陣，全無反對聲音，好易聯同校方粉飾太平。由佢地評議校政（有啲人仲有份入校董會）──影響我哋深遠嘅校政，你都咪話唔驚！

筆者首次列席呢個週年大會真係大開眼界！一開始全場爆滿，嗌哂大交，花生亂飛。事緣通過上年週年大會會議紀錄嗰陣，主席以「時間／資源」有限唔回應校友質詢，嚮資料不足、無法討論的情況下就逼人投票表態。有啲校友拎住份會議程序同佢講道理，但一句「我係大會主席，我有權決定。」質埋嚟。台下一眾無權嘅校友咪鬼殺咁嘈囉。但又有另外一啲「趕收工」嘅校友叫佢地收聲，仲舉手發言：「主席，你要做你該嘅事！」即係支持主席繼續獨裁囉。

好喇，到投完票選議席後，校友「收工」走淨一半！頭先嗌人收聲嗰個都走咗！大佬！跟住落黎先係戲肉呀！要討論議案──對你哋師弟妹尤關重要嘅校政呀！係你回饋母校嘅大好良機！你竟然同我走咗去！唔通江湖傳聞屬實，你哋個會係像皮圖章，你哋又係投票機器？跟住落嚟留低嘅、大部份都支持改革嘅校友依然係無乜時間空間去「評議校政」架。

我都唔知，校友評議會，咩料……

參考資料
一）有校友報導去年週年大會的情況：http://www.inmediahk.net/node/1007527
二）官網上載了週年大會目錄與候選人資料，可順手click去睇下校友評議會係乜東東：http://www.alumni.cuhk.edu.hk/chi/convocation/agm/2011agm.html
三）Facebook專頁：支持周澄、李達寧參選今屆中大校友評議會，引入年輕、改革聲音，裡面有埋校友寫今年週年大會情況的情況

___________________________________________________________

誰斬了中大那棵樹
文：老樹昏君

近日大家經過火車站見唔見到有棵樹比啲欄杆圍住左呢？上面仲豎左塊牌話如果見到有人斬樹就立即通知保安組添。原來晌2010年12月20日，有棵種晌方樹泉樓嘅樹比人非法晌個底部斬左（一忽），根據校方嘅講法就係個犯人想偷運棵樹走，但係太重又搬唔郁囉。

點解要偷走？原來被斬嘅果棵樹叫土沉香，係一棵極珍貴嘅受保護植物，可以用黎製造香料同藥物──就係中醫成日用嘅沉香，用黎醫肚痛嘔吐等。事發後，物業管理處園藝組已經搶救左棵樹，亦承諾會繼續觀察佢嘅康復進度。

講起樹，筆者忽然諗番起2006年由中大校友發起嘅保樹立人計劃。當時校方為配合其「美化校園」發展，大興土木，拆晒啲舊樓同斬老樹；更以擴建行人路及鞏固山坡為由，計劃靜靜雞將35棵樹連根拔起，校友們紛紛企起身反抗校方。

心都寒晒。好虛偽囉校方！今次棵樹比人斬左一忽，又大張旗鼓講到自己為左保護啲樹而花左幾多幾多心血，如果真係咁愛錫啲樹之前就唔好斬樹唔眨眼啦。