投球命中率、籃板位置，助攻次數…每個NBA球星，賽後都有堆分析數據，超級籃球迷林天然有天打完波忽發奇想：若有人都可以幫我哋數，你話幾好？幾個波友的妙想天開，造就了他辭去蘋果公司軟件工程師的筍工，由零開始：「辭職時已假定喺蘋果打工，係我人生收入嘅最高峰。」走出去就不怕輸，這間在矽谷的初創公司，新近就獲NBA球星林書豪及拿殊等注資合共400萬美元，利用人工智能技術（AI）研發手機應用程式，代替人眼記錄訓練數據。一個屬於香港仔的美國籃球夢，原來沒想像遙遠。
記者 呂麗嬋
相約短留香港一周的林天然，在母校中大會面，眼前的他，短褲加件淺色恤衫，手挽膠袋，身邊有個籃球。35歲的男生，沒典型矽谷才俊造型，親切如鄰家男孩。先後於全球最大科技公司美國微軟和蘋果公司任職軟件工程師，專責雲端系統開發。06年中大數學系畢業後，獲全額獎學金赴加拿大讀碩士後，一直留美發展，擁有絕靚工作履歷的林天然，上年卻與老友齊齊辭職創業，在矽谷成立自己的公司，開發頭炮名為HomeCourt的手機應用程式，以香港人身份走進美國，爭取做主場。
產品未正式推出市場，已在美國職業籃球界引起關注，獲真金白銀注資，投上信任一票，上月外媒如《福布斯》及《華爾街日報》紛紛報道。事實上，在美國，追看NBA籃球比賽，就如香港人周六日坐定定看英超，是生活日常。「喺美國，好多人係會好認真打籃球，每日投百幾球做訓練閒閒地，就算你無去到咁專業，讀大學喺隊入面接受訓練，教練都會叫你練射波」。練習投球、射3分波、罰球，由姿勢到企位，都是改進技術的有用資料。
過去憑人眼計算紀錄，今日以鏡頭取代收集數據，將AI應用到手機程式，由投籃命中率到在哪個位置起手，即時收集和分析，上載到雲端。「球員和教練都可即時睇到，數據除咗睇到你有無做，亦睇到你做得好唔好」。在美國市場大，研發階段已吸引投資者注資，除了港人熟悉的超級球星，看好的，還包括NBA達拉斯獨行俠（前名小牛）老闆古班。
「其實研發呢樣嘢都幾偶然，嗰時我哋幾個同事仲喺蘋果做，每星期都會約埋打籃球，又成日睇NBA比賽，見到啲明星每場比賽都有自己嘅分析數據，傾計時就話：其實我哋都好認真打吖，不過唔係明星，無人幫我哋數之嘛，若有人都可以幫我哋數，你話幾好？」尋常的波友狂想曲，大部份人諗完吹完水就鳥獸散，一行人卻認真到拉隊辭職，成立公司研發可行性。
「其實AI應用已發展成熟，但呢樣嘢，過去無人做過，諗住試吓，原來真係得」。超強技術基礎再加決心，4個人辭職埋頭苦幹，只3個月已出到試版。「嗰時仲係好初步，拎出去叩門介紹，想先睇吓市場反應，竟然比我哋預期仲要好」。注資代表投給團隊信心一票，在既是創業樂園也是萬人塚的矽谷，短短一年就由小小4人公司，發展至美國和香港都有辦事處，這間以香港人為主的初創科技公司，起步不俗。
「依家兩個辦事處有20幾人，大約一半係香港人，人數升幅好勁，因為個基數比較低」，他打趣說。現時與妻女長留美國的林天然，主力留守美國辦公室，月初難得回港一星期，接受訪問前，早上往突破青年村與中學生分享，下午就返中大與數學系師弟妹見面，馬不停蹄。「近幾年大部份時間都喺美國，但一直好留意香港新聞，見到好多年輕人對前路感到迷茫」。香港持續低氣壓，有准大學生未開學已輕生，有年輕人說移民最好，但諷刺的是，政府民望再低，薪高糧準的鐵飯碗一公開招聘，照例萬人空巷。
夢想太遠，就連大學堂也容不下「發夢」，港大早前就曾傳出，將少人報讀的純數和天文系合併到其他科目，預早與功利的現實接軌，最終沒成事，卻已引起公眾譁然。對此，讀數出身的林天然尤其心焦，自言平凡的他說距成功尚遠，但有個小故事卻一直很想分享：「year 1轉數學系，係我人生其中一個好重要嘅決定」。做過微軟蘋果，新公司又主力發展AI，有趣的他其實「數佬」出身，02年考進當時被認定出路好的資訊工程系，他卻千方百計轉讀冷門的數學系，人生轉了個大圈，他說不單不覺走了冤枉路，還覺得很值得。
「嗰時喺書展買咗堆數學書同電腦書返屋企，發現自己對數學原來更有興趣」。約晤數學系教授諮詢意見，又爭取到加拿大交流一年鑽研數學，回中大後成功轉系，心從意願：「數學其實係好多科目的基礎，好多科都會用到數學，講邏輯思維，幫助解決問題，讀數的人，肯定不會差過讀電腦的人」。敢於逆流，他相信只要找到真正的興趣，條條大路通羅馬。「我好好彩，父母唔係讀書好多，屋企亦唔係有錢，但佢哋畀好多自由我」。事實亦證明，轉系後他的成績越讀越好。
06年中大畢業，林天然獲全額獎學金赴溫哥華讀碩士，繼續鑽研數字和方程式，但有誰又想到，畢業後留美發展，輾轉竟做了lT人？「我畢業嗰時，基本上讀咩系都好，個個都想入bank（銀行），東岸主力做金融，西岸最多科技公司，我喺西岸，嗰時最大係微軟同Google，iPhone都係07年先出現」。新科技改變世界，口號亮麗又吸引，像無數大學生，他勤力遊走各大展銷活動和招聘會，找行內人了解業內情況，爭取面試機會。
「唔係讀嗰科，就要落多啲功夫搵條路出嚟，喺美國，基本上讀咩、成績點唔係最重要，你爭取到面試，現場表現先係關鍵。」如是者，他就憑充足預備，成功獲西雅圖的微軟公司取錄，受訓任軟件工程師邊學邊做，3年後再落矽谷，加入蘋果公司一做5年。生活穩定，發展可預期，上年他卻辭工創業，由零開始。「其實辭職時已假定在蘋果打工，會係我人生收入嘅最高峰。」人生嘛，就是要作最好的期望最壞的打算。「好多同學覺得揀咩科，將來一定要做某啲行業，其實呢種諗法，無論係學生定家長，都係好錯」。在他心中，條條大路通羅馬：「行出去，世界其實好大。」誰說不是？
